A rôh pơtâp, mâu kăn teăng mâ châ ‘nâi tơdroăng hbrâ, ví kong tô khăng khoăng, ôh tá bê têa, têa xăng po lân mot ƀă mâu troăng hbrâ ví ki tơtro ƀă tơdroăng kơpong tơbăng achê têa kơxĭ pa hdroh Tơdế Tơnêi têa, Tây Nguyên. Tơdroăng ki xiâm tơkŭm a xúa kơdĭng têa, xúa ki rơkê khoa hok kih thuât, hbrâ hdoăng ƀă mơ’no têa tơtro tung pêt mơjiâng tơmeăm; tơdrêng amê, mơdêk ivá ăm khu kăn ƀô̆ mơhnhôk pêi chiâk deăng tung hnê mơhno kuăn pơlê hbrâ ví tơdroăng khăng khoăng.

Tiô tối hdrối dêi Tíu xiâm pơtâng tối hyôh kong prâi Tơnêi têa, tung rơnó tô kố, a Dak Lak ai dâng 100.000 ha loăng plâi ton hơnăm ƀă loăng plâi kâ tơ’lêi ôh tá bê têa tôh; lối 42.000 rơpŏng kuăn pơlê kô tơdjâk ‘na kơnhŏng têa tôh tơmeăm, hum rôh jiếo. Drêng ai tơdroăng kố, kơvâ pêi chiâk deăng kong pơlê Dak Lak dế pêi pro mâu troăng hbrâ tăng têa, kơdroh ki tro lŭp ƀă rak vế pêt mơjiâng tơmeăm khoăng.