Bêng Đông Ninh Hòa ai hên ki ai hlâu vâ pêi cheăng ƀă kơmăi kơmok, kơphô̆ ƀă hên hĭn tơdroăng tơkêa bro ki kân môi tiah mâu kơpong cheăng ƀă kơmăi kơmok Ninh Diêm 1, 2, 3, Ninh Thủy ƀă mâu kơpong kuăn pơlê ối. Laga, ki têi dêi mơnhông cheăng kâ 9 khế apoăng hơnăm dêi bêng bu châ 7,76%, ối tung khu mâu cheăm, bêng ki pêi châ mâu tơmeăm iâ má môi.

Pôa Lê Minh Tâm, Kăn hnê ngăn Vi ƀan bêng Đông Ninh Hòa ăm ‘nâi: hên tơdroăng tơkêa bro a bêng xuân ối tung hneăng ki vâ xo tơnêi, tá hâi tơbleăng pro, pro chiâng ki kơnâ thăm mơnhông tâk mê xơpá vâ pêi châ tiô pơkâ pêi tâk plâ hơnăm cho 16%. Ki hdrối tâ, bêng tơkŭm ‘no liăn pêi cheăng tơdjuôm ƀă pêi klêi tơdroăng ki xo tơnêi vâ pro mâu tơdroăng tơkêa rĕng châ tơbleăng pro.

“Ngin pêi pro tơdroăng ki ‘no liăn cheăng tơdjuôm, pro tiah lâi mê, sap ing nôkố troh mơ’nui hơnăm khŏm châ pro tâi tâng. Pêi pro tro tơdroăng ki xo tơnêi, a bêng ai 12 tơdroăng tơkêa bro, troh nôkố, ngin hiăng pro klêi 3 tơdroăng tơkêa bro. La xuân ối 9 to tơdroăng tơkêa nếo, troh hâi lơ 15 – 20/12 athế klêi. Mê cho mâu túa vâ veăng mơdêk mơnhông tâk 16%.

Tơdroăng a Đông Ninh Hòa xuân tối ‘na môi tơdroăng ki ai khât tung tơdroăng cheăng kâ dêi Khánh Hòa, ki ai hlâu, ai tơdroăng tơkêa bro la xua trâm hên tơdroăng tơvâ ƀă hrá pơtroh chiâng ki kơnâ dêi mơnhông. Môi tiah ƀă kơvâ mơjiâng pro kế tơmeăm, meluâ hiăng tro pơtê. Pôa Nguyễn Thành Phú, Kăn pơkuâ Khu mơjiâng pro tơmeăm khoăng kong pơlê Khánh Hòa ăm ‘nâi, khu dế mơ-eăm lêi tah vâ kơvâ mơjiâng pro tơmeăm veăng gum hên tâ:

“Tâng pin pro tơ’lêi hlâu mâu tơdroăng tơkêa bro ki ai tơdjâk troh lêi tah mâu tơdroăng xơpá, tơvâ tơvân. Mâu tơdroăng tơkêa bro kô châ tơbleăng ‘no liăn pro, pơtối pro klêi, veăng gum kơhnâ ăm khu tơdroăng tơkêa ôm hyô. Peăng mâu khu ki ‘no liăn cheăng xuân athế khŏm mơ-eăm, Khu mơjiâng pro tơmeăm khoăng ƀă mâu Khu râ, kơvâ cheăng kô pơkâ đi đo vâ mơdêk rĕng tơdroăng pro. Pro tiah lâi ai tơnêi cho tơkŭm tơbleăng pêi, tâng ai tơnêi la lôi amê ôh tá thế pro klâi mê ôh tá kơnía klâi ăm tơdroăng ki mơjiâng pro tơmeăm”.

Klêi kơ’nâi 9 khế hơnăm 2026, Khánh Hòa pơkâ pêi châ GRDP lối 11,2%, mê pơkâ pêi tâk 10,88% dêi hơnăm 2026 cho ôh tá tơniăn. Mâu ivá mơ-eăm lêi tah xơpá a mâu tơdroăng tơkêa bro, mơdêk tơƀrê a mâu kơvâ cheăng ki rơdêi ki khŏm châ pro tung hơnăm la ngiâ. Pôa Nguyễn Việt Hùng, Kăn hnê ngăn Vi ƀan kong pơlê Khánh Hòa pơkâ thế mâu khu râ, kơvâ cheăng, cheăm bêng athế ‘nâi nhên tơdroăng khu mơdró kâ, tơdroăng tơkêa bro a kong pơlê, mơnhên nhên mâu tíu pêi cheăng veăng gum khât tung mơnhông vâ ai troăng hơlâ pêi pro tơtro. Pơhlêh chêh pro hlá mơ-éa athế tro, pro tơ’lêi hlâu ăm kuăn pơlê ƀă khu mơdró kâ.

“Pơkâ thế mâu cheăm, bêng athế séa ngăn kơtăng, ‘nâi nhên mâu tơdroăng tơkêa bro ki lâi, khu mơdró kâ ki lâi dế veăng gum khât ăm mơnhông dêi cheăm, nếo chiâng tŏng gum. Mâu cheăm bêng kal tơmâng ngăn troh mâu hlá mơ-éa. Pro tiah lâi drêng troh a cheăm, bêng, mâu hlá mơ-éa chêh pro dêi kuăn pơlê, khu mơdró kâ, rơpŏng tê mơdró tơ’lêi hlâu, pôi tá pro pá xuân hiăng veăng gum ăm tơdroăng ki mơnhông”.