Khu râ kăn pơkuâ dế thâ pêi pro mâu troăng hbrâ ví, tối tơbleăng kuăn pơlê hbrâ rak tơniăn. A Dak Lak, kong mêi kân pro mâu kơpong kuăn pơlê rêh ối a cheăm M’Drak tro lân lu rơdâ. Khu râ kăn pơkuâ ƀă mâu thôn, pơlê hiăng tơkŭm po séa ngăn, tŏng gum kuăn pơlê xĕn tơmeăm, mơhnhôk mâu rơpŏng a kơpong ki rơ-iô troh tíu tơniăn.

A cheăm Cư Prao, kong mêi kân lân lu rơdâ a mâu troăng kân ki hluâ têa plông. Kŏng an hiăng tâp kơƀăng tối tơbleăng, kât kơxái ôh tá ăm kuăn pơlê ƀă rơxế prôk lăm a mâu kơpong rơ-iô. Kong mêi kân ton pro chiâng lân lu a mâu têa kroăng, têa plông, têa rơlêa, tơnêi tơhnah tơhnâp ƀă lân lu a mâu kơpong thông. Khu râ kăn pơkuâ mâu kong pơlê pơchân tối kuăn pơlê ôh tá prôk tơkâ luâ kông, troăng kân ki hluâ têa plông, kơpong lân trâu lơ ai têa hiu têi; pêi tiô mâu tíu gâk tơbleăng, ôh tá prôk tơkâ tíu ki kâng tât, lơ ai têa hiu têi; pêi tiô mâu tíu gâk tơbleăng, ôh tá tơkâ hluâ xêh tíu ki kâng tât.

Vi ƀan Kuăn pơlê cheăm Canh Vinh, kong pơlê Gia Lai pơtân ôh tá ăm mâu ngế ƀă rơxế tơkâ luâ Văng Nha Sam klêi tâng tối văng mê hiăng hlo rơheăng tơnêi vâ rak rơhê a kơpêng troăng xua kong mêi hên tung mâu hâi hdrối kố nah.

Tâng kong pơtối mêi ton hâi, tơnêi rơhê kô hiu tiu tơdrêng ƀă têa, pro peăng kơpêng ki rơnâk mê ôh tá tơniăn kô pro tơnêi hiu tiô têa pro hmốu króu troh a troăng. Mâu khu ra pơkuâ cheăng dêi pơlê cheăm hiăng ai hlá mơ-éa pơtroh tối ăm kuăn pơlê ôh tá chiâng prôk chêng ƀă ôh tá chiâng to rơxế tơkâ luâ a pơla troăng ki mê. Kŏng an cheăm Canh Vinh tơrŭm ƀă mâu lêng gak ngăn mơdât, kơchăng ƀă hnê kuăn pơlê prôk troăng ki ê.

Tơdrêng ƀă Canh Vinh, nôkố, hên mâu pơlê cheăm tung kong pơlê Gia Lai dế tơ’lêi hlâu tro tơnêi tơhnâp ƀă têa lu. Mê cho, cheăm Tây Sơn tối ai 8  tíu ki nhôm tơ’lêi têa lu ƀă 11 to troăng mơni tro têa lu ó. A bêng Quy Nhơn, lối 30 rơpŏng kuăn pơlê ối a kơpong ngo Một xuân thế châ lăm ối tíu ê vâ tơniăn; cheăm Đề Gi djâ 33 rơpŏng ƀă 111 ngế a péa thôn Đức Phổ ƀă Cát Khánh lo ing kơpong tơnêi kô tơhnâp a chêng ngo Gành châ lăm ối tíu ê.