A kơpong kĭng têa kơxĭ kong pơlê Dak Lak hiăng ai mêi ƀă ai xok prăng sap kơmăng hâi lơ 8/11. Tâng tối tơbleăng kong kô mêi kân hên, kuăn pơlê a mâu kơpong klong kĭng têa kroăng Ba, kroăng Bàn Thạch ƀă kroăng Cái hiăng pro klêi mâu hơpăm ối hbrâ ví têa lu. Rơpŏng hngêi ki ai liăn pro dêi kế trá krá kak, rơpŏng xơpá tâ xuân pro ki trá ƀă tâl, pro tíu ki a’ngêi má môi tung hngêi. Pôa Nguyễn Chánh Hướng, ối a kơtâu Chùa, thôn Ngọc Phước, bêng Tuy Hòa, ăm ‘nâi:

"Tối tơdjuôm nôkố ngế ki lâi xuân pro ki trá vâ ví têa lu, xua hiăng xâu ‘nâng. Hngêi ki lâi ai chhá ki lía kô klâp dêi, ‘na báu kô ‘măn dêi drăng tíu trá ki a ‘ngêi tâi”.

Klêi rôh têa lân lu hơnăm nah pro hrĭng tâ̆n báu ŭm, hơnăm kố, kuăn pơlê tơmâng khât tâ tung tơdroăng rak ngăn hdrê ƀă phái kế kâ ‘măn kơdĭng. Báu châ tâ tung hên kơxâk ki lía, kât xi ƀă têk ‘măn a ‘ngêi má môi. Rơxế hon đa, tơmeăm điê̆n tưh, hmân ếo, pơkhom ƀă hên tơmeăm ki ê xuân châ tâ ‘măn kât xi tung kơxâk chhá, ki lía vâ pôi ta tro kơchoh tơ’nhiê tâng têa lân mot tung hngêi.

A mâu kơpong ki tơ’lêi tro têa lu trâu, klâ krê, hên rơpŏng kuăn pơlê hiăng hbrâ dêi phái kế kâ bê tung pơla sap 5 troh 7 hâi kâ. Pôa Trần Tấn Mạnh, ối a cheăm Tây Hòa, ăm ‘nâi:

“Hbrâ xâp ing têa ôu ta troh mâu phái, kế kâ, ‘măn a tíu ki xĭng lĕm vâ pôi tro kơdrâ tung rôh kong mêi khía la ngiâ”.

Sap tơdroăng hbrâ rơnáu dêi tơrêm rơpŏng troh troăng hơlâ dêi mâu kăn cheăm bêng, troăng pơkâ pêi pro “4 tơdroăng amê’’ pơtối châ mơnhên cho tơdroăng pêi pro ki kal. Khu pơkuâ hbrâ ví xía vâ dêi kong pơlê Dak Lak pơkâ thế mâu cheăm bêng mơjiâng troăng hơlâ tơtro ƀă tơdroăng hmâ trâm dêi tơrêm kơpong, tơrêm râ ki kân lơ ôh dêi kong prâi pro. Pôa Đỗ Hữu Huy, Kăn hnê ngăn Vi ƀan Kuăn pơlê dêi kong pơlê Dak Lak tối nhên hnoăng cheăng dêi kăn cheăm bêng tung tơdroăng hnê mơhno hbrâ ví xía vâ kong prâi pro ôh tá tơniăn:

"Á pơkâ thế cho 4 tơdroăng amê: pơkuâ amê, mâu ngế veăng gum amê, rơxế, plong tuk amê ƀă kế kâ tíu ối amê, hnê mơhno pêi pro vâ ti lâi ai troăng hơlâ tŭm tâi tâng. Kăn hnê ngăn Vi ƀan mâu cheăm bêng cho mâu ngế ki chiu pôu râng tâi tơdroăng, thế troh hnê mơhno amê. Xoăng hnoăng cheăng ăm rĕng cheăm tơmâng khât  troh tơrêm to thôn, tơrêm kơphô̆”.

Kong prâi pro ôh tá tơniăn thăm rế rơ-iô, pá vâ ‘nâi hdrối. Tơdroăng hbrâ hdrối tơrêm rơpŏng hngêi, tơdrêng ƀă troăng hơlâ hbrâ ví hdrối dêi mâu kăn pơlê cheăm, kô veăng kum kơdroh kơdrâ, kơdroh ki pá ăm mâu khu veăng tŏng gum ƀă kơdroh ki lŭp xua kong mêi kân têa lân lu pro.