Kăn xiâm pơkuâ hnê ngăn Đảng, Kăn xiâm hnê ngăn tơnêi têa kheăn kơdeăn mâu tơdroăng mơ’no liăn cheăng châ tơƀrê dêi mâu grup pơkuâ, khu tê mơdró kong têa Nhuk a Việt Nam tung mâu hơnăm hiăng hluâ. Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế, mâu grup pơkuâ tơdroăng cheăng kâ dêi kong têa Nhuk ôh tá xê to po rơdâ tơdroăng tê mơdró, mê kô pơtối cho khu tơrŭm ki loi tơngah, ton xŏn, rơtế Việt Nam mơnhông hngêi trăng, troăng klông hngêi kơmăi kơmok, on tơhrik ki vêh pro, tíu ki tơdjâk tê mơdró hên kơvâ ƀă mâu tơdroăng ki kơnâ nếo a Việt Nam.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối ăm ‘nâi, Việt Nam dế mot hneăng mơnhông nếo, khŏm mơ-eăm pêi pro pơkâ xiâm chiâng mâu kong têa mơnhông mơdêk, pêi lo liăn hên a hơnăm 2045. Vâ pêi pro pơkâ mê, tơdroăng kal vâ mơhnhôk tăng liăn ăm mơjiâng hngêi trăng, troăng klông ton xŏn, on tơhrik, khoa hok kŏng ngê̆, pơhlêh pêi cheăng krúa lĕm kong prâi ƀă mơdêi ivá tơbriêt cheăng dêi tơdroăng cheăng kâ kân.

Việt Nam pơtối kêi đeăng troăng pơkâ pêi, rak tơniăn lĕm tíu mơ’no liăn cheăng; tơniăn cheăng kâ kân, gâk kring hnoăng ƀă ki pơxúa luât, tơxâng dêi mâu khu mơ’no liăn cheăng, pro tơ’lêi hlâu ăm mâu khu tê mơdró lâp plâi tơnêi pêi cheăng châ tơƀrê, ton xŏn a Việt Nam.