Container cà phê tê ăm kong têa ê rôh kố ai lối 3,4 tâ̆n kơphế xú lĕm, ƀă vâ chê 120.000 dollar Mih, cho tơmeăm dêi Kong ti Pêi cheăng tiô rơnó Aeroco Coffee. Kố cho hdró hvêa prôk ki kal tung tơdroăng tê mơdró kơphế Fine Robusta, pơtroh ing pơla tơbleăng, tối ki tơbrê lĕm chiâng mơnhông tê mơdró khât a Mih- môi tung mâu kơchô mơdró kơphế kân ƀă kơlo tơbiêt rôe hên tung lâp plâi tơnêi.

Pôa Nguyễn Tấn Vinh, ngế rơkê ‘na kơphế  tối, kơphế xú lĕm a Dak Lak hiăng ai hvêa prôk mơnhông hôm. Mơhno cho Hneăng tơ’noăng Kơphế xú lĕm Việt Nam -Amazing Cup, sap lối 50 túa veăng tơ’noăng tung mâu hơnăm apoăng tơkŭm po cho hơnăm 2019, troh nôkố hiăng tâk lối 200 túa. Hên khu mơdró hiăng veăng tơmâng hên tâ a tơdroăng mê ƀă chôa lâng djâ kơphế xú lĕm châ tơbleăng tê a mâu kơchô lâp plâi tơnêi. Tiô pôa Vinh, Dak Lak ai hên tơdroăng tơ’lêi hlâu vâ rế pro pơxúa tâ ‘na kơphế :

“Mâu tơdroăng vâ mơnhông kơphế dêi Dak Lak hiăng ai sap ing ton nah, mê chi ki vâi pơ eăng inâi  Buôn Ma Thuột. Má péa a Dak Lak ai Tíu xiâm tí tăng ‘nâi plĕng ‘na kơphế Robusta. Má 3 cho tơnêi tíu xuân môi tiah túa pêt kơphế ton hơnăm dêi kuăn pơlê. Mâu tơdroăng ki mê vâ mơnhông kơvâ kơphế hiăng tơkŭm tŭm tâi. Ki kal má môi nôkố Dak Lak kô tơbleăng tối, tăng troăng hơlâ ƀă ai tơnêi têa veăng râk ngăn môi tiah lâi vâ kơvâ pêt kơphế hiăng mơnhông rơdêi ƀă rế rơdêi tâ nếo”.

A leh tê ăm kong têa ê kơphế chính ngạch kê̆n kong têa Mih, pôa Đỗ Đức Hà, Kăn xiâm hnê ngăn Vi ƀan Kuăn pơlê bêng Ea Kao, tơngah túa pêi pêt, uâ pơliê pro kơphế xú lĕm kô pro xiâm ki mơhnhôk vâ mâu khu pêi cheăng tơrŭm, khu mơdró tí tăng hriĕn plĕng, hriâm ƀôi, po rơdâ, tăng tơ’nôm ăm mơngế ai cheăng pêi ƀă mơdêk pê lo liăn ăm mơngế ki pêt kơphế. Bêng Ea Kao châ tối cho môi tung mâu tíu ôm hyô dêi kong pơlê Dak Lak, xua mê bêng pơkâ tơdjêp ƀă mâu kơpong pêt kơphế ƀă tơdroăng ôm hyô, veăng tơbleăng um méa kơphế Dak Lak troh ƀă tơmối ƀă mâu pú hmâ tung lâp plâi tơnêi.

“Ngin tơngah inâi kơhế Aeroco tối krê ƀă mâu kơphế ki ê dêi Ea Kao tối tơdjuôm kô rơtế ƀă mâu tơdroăng pêi pêt rak ngăn kơphế dêi kong pơlêDak Lak la ngiâ kô veăng cha atơbleăng um méa kơphế Dak Lak troh mâu kong têa tung lâp plâi tơnêi”.