Tung pơla lăm pôu pêi cheăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng tơpui tơno rơtế pôa Takaichi Sanae, Ngế pro xiâm hnê ngăn kong  pơlê Nhuk; xông tơpui a Kuô̆k hô̆i kong têa Nhuk, lăm pôu kong têa Kanagawa; Trâm mâu ngế hriăn plĕng tơdroăng cheăng, ngế ai tuăn ngôa rơkê, ngế cheăng khoa hok ki má môi Việt Nam a kong têa Nhuk; Veăng hôp tơpui tơno tơnêi têa ngế krê ‘na tơrŭm cheăng khoa hok kŏng ngê̆ Việt Nam – Nhuk; Trâm mâ mâu khu tơrŭm liăn ngân ối má môi kong têa Nhuk ƀă tơkŭm po hên rôh trâm mâ khu râ kăn xiâm ki kal kí ê. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă Ngế pro xiâm hnê ngăn kong têa Nhuk môi tuăn Tơbleăng Troăng tơmiêt la ngiâ tơdjuôm Việt Nam – Nhuk vâ mơdêk tơrŭm cheăng ‘’ Khu tơrŭm cheăng tâi tâng Việt Nam – Nhuk xua hơniêp lĕm ƀă tơniăn mơnhông a châu Á ƀă tung lâp plâi tơnêi’’ to a râ nếo, ing ihiâm mơno ‘’Khu tơrŭm cheăng rơtế prôk, tơtế mơjiâng, rơtế ai pơxúa, xua tơtêk dâi lĕm, pơkuâ xêh troăng pêi cheăng ton xŏn ƀă mơ-eăm xêh’’.

Tơdroăng châ tơƀrê rôh lăm pôu dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng veăng gum kal khât pơtối thăm pêi pro krá kâk ƀă pêi pro trâu hơhngế tâ tơrŭm cheăng Khu tơrŭm cheăng tâi tâng Việt Nam  - Nhuk, tơkŭm mơdêk tơrŭm păng ‘nâng, tâi tâng tung mâu kơvâ ki xiâm, mơjiâng tơ’nôm rôh mơnhông dêi rêm tơnêi têa, djâ ki pơxúa păng ‘nâng ăm kuăn pơlê ƀă veăng gum ăm hơniêp lĕm, tơniăn, mơnhông kro mơdrŏng dêi kơpong.