Kơxo lơ 11/11, a bêng Quy Nhơn Nam, kong pơlê Gia Lai, xua kong mêi kân, chât met khô̆i tơnêi hmố rơtế loăng kân kơdrâ tơhnâp chu a troăng kân Tơnêi têa 1D. Trâp tơnêi, hmố lâp troăng kân pro hâ ho tơdjêp ƀă kong pơlê Dak Lak. Kơ’nâi mê, kơ koan cheăng kong pơlê Gia Lai mơhnhôk khu cheăng, kơmăi tŏng ƀă rơxế pêi cheăng pơto tơnêi hiăng troh a mê vâ gu tah tơnêi hmố; tơdrêng amê kâng tât, hnê mơhno rơxế prôk troăng ki ê. Xuân a troăng kân Tơnêi têa 1D, troăng văng Quy Hòa châ kâng tât, ôh tá ăm rơxế prôk lăm xua tơ’lêi tơhnah tơhnâp. Khu cheăng tŏng xo mơngế hliăng tiâ, tŏng gum mơngế pơtroh mơngế pêi cheăng a tíu ki kal, hbrâ tŏng xo, hbrâ tŏng gum xĕn kuăn pơlê. Ing kơxê lơ 11/11, rơpâu hok tro a bêng Quy Nhơn Bắc ƀă mâu cheăm Canh Vinh, Tuy Phước hiăng châ ăm pơtê hriâm xua kong mêi kân, têa lân lu kân, pro rơ-iô drô troh hngêi trung.

Kong mê kân mê ton 2 hâi hdrối pro têa a hên têa kroăng, têa plông a peăng mâ hâi Lo kong pơlê Dak Lak têa tâk đik, lu a hên kơpong kuăn pơlê ối. A mâu cheăm Xuân Lãnh ƀă Đồng Xuân, kăn pơkuâ cheăm hiăng ‘mâi xê̆n lối rơpŏng kuăn pơlê ƀă tơmeăm troh tíu ối tơniăn, tơdrêng amê hlối mơdât mâu tíu ki tro têa lu a troăng kân 19C. A mâu cheăm Tuy An ƀă Đồng Xuân, ai mâu hngêi trung hriâm hiăng ăm hok tro pơtê hriâm. Khu ki ai tơdjâk troh hiăng xoăng a mâu tíu ối, hbrâ rơnáu ví ƀă mâu tơdroăng ki trâm. Kơ koan pơtâng tối hyôh kong prâi tơbleăng mơni kô ai khía mơhot têa lân lu, t’ơnêi tơhnah tơhnâp a kơpong kong ngo ƀă têa lu ó a mâu kơpong klơng kĭng têa kroăng kơpong peăng mâ hâi Lo kong pơlê Dak Lak. Kăn pơkuâ ƀă kơ koan ki ai tơdjâk pơchân kuăn pơlê mơdêk tơdroăng hbrâ kơchăng, pôi tá lăm troh a mâu kơpong ki tro têa lu trâu, têa hiu têi, vâ rak tơniăn ivá châ chăn.

Kong mêi kân ton hâi hên tíu a kong pơlê Quảng Ngãi pro lân lu, tơhnah tơnhâp, tơklâ hên troăng kân. A cheăm Sơn Tây, troăng kân Trường Sơn Đông ai 3 tíu tơhnah tơhnâp, pro chôm drô troăng kân sap hâi lơ 11/11. A cheăm Phước Giang, tŭm 10 thôn pơrá tro lân lu, mâu kơpong têa đik kân lối 1,5 met.

Mâ khu cheăng hiăng tŏng gum kuăn pơlê a mâu kơpong lân lu trâu prôk lăm troh tíu tơniăn. A cheăm Ngọc Linh, khu râ kăn pơkuâ hiăng thâ xĕn 115 rơpŏng ƀă 393 pơ’leăng mâ mơngế troh tíu hmuâ tơniăn. Ki tô tuăn má môi cho kơpong Đăk Rế ai hên tíu rơheăng a ngo, mơnhâu tơdrêng 96 rơpŏng kuăn pơlê rêh ối pá kơdâm chêng ngo. Tâi tâng mâu rơpŏng kuăn pơlê kố châ xĕn troh hmuâ a hngêi hôp kân Viƀan kuăn pơlê cheăm.