A rôh tơdah, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ăm ‘nâi Việt Nam vâ pơtối mơdêk tơrŭm cheăng ƀă Nhuk; pơtối râk ki tơrŭm pơla péa Đảng, péa tơnêi têa. Tung la ngiâ, pôa Tô Lâm vâ péa Đảng pơtối mơdêk tơpui tơno, ƀă tâi tâng khu kăn rêm râ, veăng môi tuăn ƀă dêi rơpó a mâu hneăng hôp tơpui hên troăng dêi Đảng.

Pơtối tơbleăng pêi ai pơxúa Tơpui tơno ƀă tơpui leăng ƀă dêi rơpó đi đo; púi vâ Đảng Kŏng sản Nhuk pơtối veăng môi tuăn péa tơnêi têa mơdêk tơrŭm tung mâu kơvâ cheăng ki nếo, ai rơkong tơpui ƀă Chinh phuh Nhuk vâ rĕng tơmâng pro hlâu mơjiâng tơdroăng pêi cheăng ôh tá pơrah dêi rơpó, hlâu ăm mâu kuăn pơlê Việt Nam ki pêi cheăng a Nhuk.