Cho khu mơdró tê ăm kong têa ê kế tơmeăm pê lo ing chiâk deăng hên má môi a Dak Lak, ƀă pé túa tơmeăm ki hên cho kloăng kơphế ƀă tiu, kong ti pêi cheăng tiô rơnó môi tung khu dêi Kŏng ti xiâm Simexco 2-9 Dak Lak kal ai liăn hên vâ rôe mâu tơmeăm ki vâ uâ pơliê, tê ăm kong têa ê. Pôa Nguyễn Tiến Dũng, Phŏ kăn pơkuâ xiâm Kŏng ti, ăm ‘nâi khu mơdró nôkố ai rơlối chĕn iâ khế, iâ hơnăm lối 11.000 rơtal liăn a 18 to hngêi rak liăn.

Tung pơla mê kơxô̆ liăn ‘no pêi cheăng tâk hên, tơdroăng mâu hngêi rak liăn kơdroh liăn rơkâ ăm mung kô gum khu mơdró kơdroh hên kơxô̆ liăn, pro tơ’nôm  kơxô̆ liăn ‘no ƀă mơdêk ivá tơbriât cheăng.

“Vietcombank cho hngêi rak liăn ki djâ troăng ahdrối tung pêi pro kơdroh liăn rơkâ tiô hnê mơhno dêi Chin phuh. Ƀă kơlo pơkâ mung 1.500 rơtal liăn, kơlo kơdroh liăn rơkâ nôkố sap 1 troh 1,5% gum khu mơdró ngin kơdĭng dâng 1 troh 1,5 rơtal liăn rêm khế. Ing mê, kơdroh kơxô̆ liăn rơkâ mung, ai tơ’nôm liăn vâ ‘no mơnhông ‘na mơdró kâ”.

Ôh ti xê to khu mơdró tê ăm kong têa ê tơmeăm pê lo ing chiâk deăng hên, mâu khu mơdró krâ kơvâ ƀă kŭn a Dak Lak xuân dế châ xúa ing luât pơkâ kơdroh liăn rơkâ dêi Chin phuh. Pôa Đặng Anh Dũng, Ngế pơkuâ môi khu mơdró cheăng ‘na tê mâu tơmeăm vâ ‘mêng, rơnêu ô tô a bêng Buôn Ma Thuột, ăm ‘nâi, khu mơdró nôkố ai rơlối chĕn iâ khế hơnăm lối 50 rơtal liăn a 3 to hngêi rak liăn. Tung mê, kơxô̆ liăn mung 15 rơtal liăn a hngêi rak liăn Agribank Dak Lak hiăng rĕng châ kơdroh liăn rơkâ ki mung, rôh apoăng gum khu mơdró kơdroh hngăm hngo ‘na kơxô̆ liăn ‘no pêi cheăng.

“Á dế mung liăn a hngêi rak liăn Agribank Dak Lak. Pơla hdrối kố nah, hngêi rak liăn hiăng pro hlâu, tơbleăng kơlo kơjo kum liăn rơkâ ăm khu mơdró. Mê cho, hngêi rak liăn kơjo gum kơdroh liăn rơkâ ki mung troh 1,5% tiô troăng hơlâ dêi Chin phuh. Tung la ngiâ, a púi vâ mâu hngêi rak liăn xuân rơtế tơbleăng luât tŏng gum mê, gum khu mơdró kơdroh kơxô̆ liăn ‘no cheăng, ai tơ’nôm ivá vâ mơnhông krá tơniăn ton”.

A Dak Lak, Agribank cho môi tung mâu hngêi rak liăn rĕng tơbleăng kơdroh liăn rơkâ tiô hnê mơhno dêi Chin phuh ƀă hngêi rak liăn Tơnêi têa. Pôa Võ Tiến Nam, Phŏ kăn pơkuâ Agribank Dak Lak, ăm ‘nâi, klêi ai hnê mơhno, Hngêi rak liăn hiăng tăng ngăn kơxô̆ liăn mung, ‘nâi nhên mơngế ki mung ai tŭm ivá vâ ‘mâi hơ’lêh liăn rơkâ ki mung. Rôh kơdroh liăn rơkâ apoăng châ tơbleăng pêi pro sap hâi lơ 25/10 kố nah.

“Ƀă kơxô̆ liăn mung iâ hơnăm nôkố ai liăn tơkâ kơpêng 10% tung môi hơnăm ƀă kơxô̆ liăn mung ton hơnăm ai liăn rơkâ kơpêng 11% tung môi hơnăm, tâi tâng mâu hngêi rak liăn hiăng pêi pro kơdroh liăn rơkâ mung ăm lối 28.000 ngế ki mung, ƀă tâi tâng kơxô̆ rơlối chĕn lối 9.800 rơtal liăn, tâi tâng kơxô̆ liăn tơkâ châ kơdroh ăm mơngế ki mung ai vâ chê 20 rơtal liăn. Ƀă mâu kơxô̆ liăn mung ki nếo mung xúa pêi chiâk, tê mơdró ƀă ‘na tơdroăng ki gum mung pêi tơdroăng kal, hngêi rak liăn tơbleăng kơdroh liăn tơkâ mung sap 1,5 - 2% tung môi hơnăm”.

Ƀă dâng 18.750 khu mơdró ƀă lối 82.000 rơpŏng ki dế mơdró kâ, khu mơdró kâ ai hnoăng pêi pro ki kal ƀă mơnhông cheăng kâ ƀă kơxô̆ liăn pê lo nâp hnoăng mơhá ăm hngêi rak liăn ngân kong pơlê Dak Lak. Tiô pôa Nguyễn Quang Vinh, Kăn hnê ngăn Khu mơdró kâ rơkê kong pơlê Dak Lak, tơdroăng Chin phuh hnê mơhno kơdroh liăn rơkâ a rôh kô ai pơxúa khât ‘nâng, kum khu mơdró kơdroh ki pá ‘na liăn ngân, malối cho tung pơla kơxô̆ liăn ‘no pêi cheăng tâk ƀă kơchơ mơdró ối hên tơdroăng ôh tá tơniăn. Pôa Vinh pâ thế, mâu hngêi rak liăn tơbleăng tâi tâng, vâ luât pơkâ tŏng gum mê pơtối rak vế ki pơxúa tơbrê trâu rơdâ tâ nếo.

“Chin phuh nôkố ai troăng hơlâ tơtro tung tơdroăng kơjo gum mâu khu mơdró dế trâm pá, malối khu mơdró tê kế tơmeăm ăm kong têa ê, khu mơdró tung kơvâ ‘na chiâk deăng ƀă khu mơdró krâ kơvâ ƀă kŭn. Tiô troăng hơlâ mê, a púi vâ mâu hngêi rak liăn rĕng môi tuăn, tơbleăng tâi tâng vâ kơxô̆ liăn rơkâ tơdjuôm chu kơdroh hên, kơjo kum khu mơdró kơdroh ki hngăm hngo tung ‘no hrê kơxô̆ liăn ki mung”.

Dak Lak nôkố ai 46 hngêi rak liăn tung tơnêi têa ƀă lâp plâi tơnêi dế pêi cheăng, ƀă tâi tâng kơxô̆ liăn ối chĕn dâng 300.000 rơtal liăn. Kố cho xiâm ki kal vâ mâu khu tơrŭm ăm mung liăn rơtế ƀă, kơjo gum khu mơdró ƀă mâu rơpŏng ki mơdró mơnhông cheăng kâ. Tơdroăng kơdroh liăn rơkâ ăm mung ôh ti xê to gum mơngế ki mung kơdroh kơxô̆ liăn ‘no pêi cheăng, kơdroh ki pá ‘na liăn ngân mê ối tơ’nôm ivá pơtối ‘no liăn pêi cheăng, po rơdâ pêi cheăng kâ, tê mơdró./.