Tơdroăng po apoăng tơdroăng ki kal mơhnhôk tơdroăng kal vâ, mơhnhôk tơmối tung hơnăm, gum djâ ôm hyô chiâng kơvâ cheăng kâ ki xiâm dêi kong pơlê. Kố xuân cho roh vâ pơ-ôu pơ-eăng ki kơnâ tơdroăng roh ton nah, khôi túa lĕm tro, kuăn mơngế Tây Nguyên, tơdrêng amê koh phiu ro 51 hơnăm Hâi tơleăng lĕm Phú Yên.

Ing mâu tơdroăng pêi cheăng, Dak Lak tơbleăng um tíu troh pêng păm khôi túa, lĕm achê ƀă pro tơmối tung tơnêi têa ƀă kong têa ê hâk vâ troh. Roh kố, kong pơlê Dak Lak tơkŭm po mâu tơdroăng ‘na ôm hyô môi tiah: Kơchơ tê mơdró – Ôm hyô, OCOP ƀă tơmeăm kơhiâm kong pơlê; tơdroăng ngê̆ thuât, khu famtrip séa ngăn, rơtế roh hôp mơnhên tơdroăng pêi ôm hyô ‘’Dak Lak – Vêh kơpong tơmeăm vâi krâ nah’’, ing mê, thăm tơdjêp, mơhnhôk mơ’no liăn cheăng ƀă mơnhông ôm hyô krá tơniăn.