Rak vế tơniăn khât ăm hơnăm 2023 hneăng tơ’noăng râ má pái phôh thong. Kố cho 1 tung mâu tơdroăng ki kal châ Khu hnê mơhno hneăng tơ’noăng râ má pái trung hok phôh thong hơnăm 2023 kong pơlê Dak Lak tối nhên a rôh hôp tơbleăng ‘na hneăng tơ’noăng trung hok phôh thong hiăng vâ chê troh. Hneăng tơ’noăng hơnăm kố, lâp kong pơlê Dak Lak ai lối 21.000 ngế hok tro chêh inâi tơ’noăng, tung mê hok tro hdroâng kuăn ngo châ 28%.

 ‘Na tơdroăng tơ’noăng, ai 33 tíu tơ’noăng ki khât ƀă tâi tâng ai 900 to lâm tơ’noăng. Troh nôkố, mâu tíu pêi cheăng hiăng rak vế tơniăn mâu tơdroăng, hbrâ rơnáu mâu kế tơmeăm xúa a mâu tíu tơ’noăng, tíu ki sao in ko ƀai tơ’noăng ƀă tíu ki châ̆m tơ’noăng tiô pơkâ. Tiâ rơkong kơ-êng ‘na hiâm mơno tôu tuăn dêi mâu hok tro, nôu pâ klêi kơ’nâi ai rôh ki ôh tá tơniăn a tíu pêi cheăng Vi ƀan hnê ngăn péa to cheăm a tơring Čư̆ Kuin, Khu hnê mơhno hneăng tơ’noăng, ăm ‘nâi dế pêi pro tro hnoăng cheăng hnê tối, mơhnhôk hiâm mơno vâ hok tro hmiên tuăn tơ’noăng. Tơdrêng amê hlối tối nhên hiăng hbrâ rơnáu nhên, rak vế tơniăn má môi tung mâu hâi ki po tơ’noăng.