Séa ngăn a mâu kơchơ a pơlê kong kơdrâm Ƀuôn Ma Thuột môi tiah kơchơ Tân An, kơchơ kân Ƀuôn Ma Thuột, tơdroăng ki roê kế tơmeăm Têt pơxiâm hlo hên. Hlo hên hĭn hdrối tâ cho ‘na roê hmân ếo, yêp, chêng khŏng. Mâu kơbong ki tê kơƀăn kĕo, mưt, xuân hiăng hlo vâi ‘măn tơbleăng tŭm túa, ngăn lĕm mơnâ.

Nâ Lê Thị Diễm Huyền, ngế ki tê hmân ếo a Kơchơ kân Ƀuôn Ma Thuột ăm ‘nâi, dế nôkố ivá roê kế tơmeăm hiăng hlo tâk iâ, la nâ xuân ối kơchăng, tơmiât nhên drêng roê ‘mot kế tơmeăm vâ tê:

“Hơnăm kố xuân ‘măn kơdĭng iâ kế tơmeăm ki lĕm, hơnăm kố Noel ƀă Têt gá achê ƀă dêi rơpó mê chiâng pro vâi krâ nhŏng o ki tê tơmiât hên. Tơdroăng ki roê tê hơnăm kố mê hlo xuân châ tê i iâ xo, ôh tá hên”.

Tiô nâ Nguyễn Thị Nga, a bêng Tân Hòa, pơlê kong kơdrâm Ƀuôn Ma Thuột, mâu tíu ki tê mơdró nôkố vâi tơchĕng tơmiât hên drêng roê ‘mot kế tơmeăm vâi roê ‘mot ăm tơtro ƀă tơdroăng ki ai khât. Xua môi tiah rơpŏng nâ, maluâ hlo kơchơ Têt hơnăm tê hên kế tơmeăm, la nâ ôh tá roê hên môi tiah rêm hơnăm:

“Á hlo mâu kế tơmeăm tê tung hơnăm kố gá hên, tŭm túa tơmeăm, yă tê mê hlo tơniăn tâ hơnăm nah môi iâ. Krê tơná á mê á roê mâu kế tơmeăm ki kal xo, ƀă mâu kế kâ ki ối drêh, ối rêh mê tơkôm vâ chê troh a Têt ah mê á nếo roê ăm mâu hâi 30, hâi má môi 1 Têt, ƀă hâi má 2,3,4,5 mê tâi tâng mâu kế tơmeăm ki mê mâu kơchơ mê vâi hiăng tê tâi mê rơpŏng á ôh tá roê ‘măn kơdĭng, ôh tá roê ‘măn tung kơtuh hên".

A siêu thị Co.opmart Ƀuôn Ma Thuột, nôkố kế tơmeăm ki tê tung rôh Têt hiăng hên; tung pơla kơxô̆ kế tơmeăm Việt Nam tơbleăng tê châ troh 95%. Jâ Trần Thị Thành Nhân, kăn phŏ pơkuâ Siêu thị ăm ‘nâi, hơnăm kố, pakĭng pêi pro tơdroăng ki rak tơniăn yă, siêu thị ối ai hên tơdroăng ki kơjo kum dế châ xúa pơtối hlối sap ing nôkố troh Têt.

“Tíu pêi cheăng hiăng ai túa pơkâ ‘măn kơdĭng kế tơmeăm ƀă kơlo to tâ tâng pơchông ƀă hơnăm nah ai 15%, tíu pêi cheăng xuân hiăng tơrŭm ƀă mâu khu ki tê kế tơmeăm pơkâ túa vâ bro tê xuân môi tiah mơdêk mâu kế tơmeăm ki ‘măn kơdĭng vâ rak vế tơniăn kế tơmeăm tê châ tŭm ƀă hên túa tơmeăm. Siêu thị Coop mart đi đo tơhrâ pro tơniăn yă ƀă rơpâ tâ tâng pơchông ƀă mâu kơchơ ki ê sap ing 5 troh 10% liăn tơdrêng amê hlối ối tê hên kế tơmeăm, tơbleăng hên tơdroăng ki roê tơmeăm ai hbru ăm tơmeăm ki ê ‘na tơdroăng ki pơkâ yă vâ mơdêk tơ’nôm hnoăng pơxúa ăm mâu ngế ki roê tơmeăm”.

Dak Lak nôkố ai 148 to kơchơ, 1 to kơchơ kân, 8 to kơchơ tíu xiâm tê mơdró, siêu thị ƀă lối 60 to tíu tê kế tơmeăm ƀă mâu tíu tê mơdró kế tơmeăm ki ê. Tiô pôa Lưu Văn Khôi, Kăn pơkuâ Khu ngăn cheăng kơmăi kơmok ƀă tê mơdró kong pơlê Dak Lak, kơxô̆ kế tơmeăm ki ‘măn kơdĭng Têt hơnăm kố tâk dâng 56% tâng vâ pơchông ƀă hơnăm nah.

“Khu ngăn cheăng kơmăi kơmok ƀă tê mơdró ngin hiăng pêi cheăng ƀă mâu tíu ki mơjiâng bro tê mơdró, mâu tíu ki tê, mâu siêu thị, Tíu xiâm tê mơdró vâ pơkâ thế mâu tíu pêi cheăng kố mơdêk mơjiâng bro tê mơdró kế tơmeăm mê nếo ai túa pơkâ tí tăng mâu kế tơmeăm ƀă hbrâ rơnáu ‘măn kơdĭng mâu kế tơmeăm vâ rak tơniăn tŭm kế tơmeăm tê ăm mâu ngế ki roê tung rôh mơ’nui hơnăm xuân môi tiah rôh Têt Lo hơnăm nếo Quý Mão 2023”.

Kong pơlê Dak Lak ai lối 1,8 rơtuh ngế kuăn pơlê. Kơ koan ki ai tơdjâk tiô tối hdrối tơdroăng ki rơhêng vâ roê kế tơmeăm tung khế têt kô tâk 20% tâng pơchông ƀă tiah hmâ. Xua mê, Vi ƀan hnê ngăn kong pơlê Dak Lak kum lối 1.510 rơtal liăn vâ ‘măn kơdĭng kế tơmeăm ki kal. Khu kế tơmeăm ki châ kong pơlê Dak Lak mơnhên kal bro tơniăn yă tung kơchơ mơdró ƀă ‘măn kơdĭng cho kế kâ, mâu hơ’nêh chu, í, peâp, kơtâ í, peâp, têa rơmâ,xik, po, ƀôt ngot ƀă mâu kế kâ ki vâi bro, kơchâi plâi, pôm, têa châu, têa kơxăng.

Nôkố hiăng ai 10 khu mơdró kâ ki kân mơjiâng túa pơkâ hbrâ rơnáu kế tơmeăm, ‘măn kơdĭng kế tơmeăm, têa châu têa kơxăng ƀă dâng 420 rơtal liăn.

Sap ing hdrối ƀă klêi kơ’nâi Têt Lo hnăm nếo Quý Mão 2023, khu ki ai tơdjâk kong pơlê Dak Lak hiăng pêi pro séa ngăn kơtăng, séa ngăn kơchơ tê mơdró vâ teăm châ hlo, pơkâ tơleăng kơtăng mâu ngế ki pro xôi luât môi tiah, gô̆m tơmeăm, tê mơdró kế tơmeăm ki tro mơdât, kế tơmeăm ki roê ôh tá tro luât, kế tơmeăm ôh tá ‘nâi xiâm kối, mơjiâng bro, ôh tá tĕm inâi, lu lêa tung tê mơdró ƀă hên ki ê.

Kăn pơkuâ Khu ngăn kơchơ tê mơdró kong pơlê Dak Lak ăm ‘nâi, dế tơbleăng túa pơkâ ki hbrâ mơdât tê mơdró kế tơmeăm ki ôh tá tro luât, lu lêa tung tê mơdró ƀă tê kế tơmeăm ôh tá xê khât tung mâu khế mơ’nui hơnăm 2022 xuân môi tiah tung pơla hdrối ƀă klêi kơ’nâi Têt Lo hơnăm nếo Quý Mão. Pakĭng mê, khu rak ngăn kơchơ tê mơdró pơtối lăm séa ngăn a lối 70 tíu ki tê tung mê ai, mâu hnôu ki tơkŭm tơmeăm, mâu tíu xiâm tê mơdró, siêu thị, kơchơ kân, tá mâu ngế krê ki tê mơdró ing măng pơlê pơla ƀă hên ki ê vâ pơkâ tơleăng kơtăng mâu ngế ki bro xôi luât ‘na tê mơdró, pro pơxúa ăm dêi tơná a rôh mơ’nui hơnăm, a chê Têt vâ mơdêk yă ôh tá tơtro.