VOV4.Xơ Đăng - Kơxê lơ 19/7, Vi ƀan tơring Krông Păč, kong pơlê Dak Lak tơkŭm po hôp khu chêh hlá tơbeăng, tơbleăng tơdroăng ‘’Leh ro ‘na plâi sầu riêng tơring Krông Păč’’ roh má môi, hơnăm 2022, vâ mơdêk ki kơnâ plâi ki xiâm pêi lo liăn dêi tơring kố. Ƀă dó inâi ‘’Mơdêk ki kơnâ dêi plâi sầu riêng Krông Păč’’, leh kô tơkŭm po sap hâi lơ 1/9 – 3/9/2022 ƀă mâu tơdroăng pêi: Hneăng hôp mơhnhôk kơbông krếo mơ’no liăn cheăng ƀă mơnhông pêt mơjiâng tơmeăm pêi lo ing chiâk deăng, pêi chiâk deăng krá tơniăn tơring Krông Păč; Leh mơdĭng troăng kơphô̆; Tơ’noăng hơdruê xuâng ƀă mơđah tơbleăng xah kế hdroâng kuăn ngo tơring Krông Păč; Lăm pôu ngăn kơpong rak tơmeăm ton nah deăng kơphế Ca Da; Rah xo ‘’Kơdrum plâi sầu riêng lĕm – lĕm ƀă kong prâi’’ ƀă châ kâ plâi sầu riêng a kơdrum, kơchơ mơđah tơbleăng mâu tơmeăm OCOP...

Mơngế rôe troh rôe plâi sầu riêng ăm kuăn pơlê a tơring Krông Păč

Cho tơring ai ƀăng pêt plâi sầu riêng châ ¼ ƀăng pêt plâi sầu riêng dêi lâp kong pơlê Dak Lak, plâi sầu riêng hiăng chiâng plâi kâ ki pêi lo liăn xiâm djâ ăm pêi lo liăn ăm kuăn pơlê ƀă kum mơnhông mơdêk cheăng kâ a tơring. Leh ro plâi sầu riêng tơring Krông Păč cho roh pơ-ôu pơ-eăng mơngế pêt plâi sầu riêng ƀă mâu tơdroăng ki kơnâ ing plâi kâ kố djâ ăm. Tơdrêng amê, ing leh ro vâ tơdjêp, tơbleăng tơmeăm ki rơdêi, roh tơ’lêi mơ’no liăn cheăng tung pêt mơjiâng, pro ƀă tê plâi sầu riêng ƀă mơnhông mơdêk khôi túa lĕm tro, ôm hyô tơring troh kơchơ tung tơnêi têa ƀă kong têa ê.

A Sa Ly tơplôu ƀă tơbleăng