VOV4.Xơ Đăng - Kơxo lơ 28/9, a pơlê kong kơdrâm Ƀuôn Ma Thuột, Vi ƀan hnê ngăn kong pơlê Dak Lak tơkŭm po rôh hôp trâm mâ mâu khu ki tŏng kum kong têa ê a Dak Lak hơnăm 2022. Rôh hôp kố ai tơdroăng ki veăng dêi 8 khu tơrŭm a kong pơlê ƀă mâu tíu tơdjêp tơdrêng ƀă 16 khu tơrŭm, kơ koan teăng mâ kong têa ê a Việt Nam.

Dak Lak: Rôh hôp trâm mâ mâu khu tŏng kum kong têa ê a kong pơlê hơnăm 2022

Tiô Khu ngăn ‘na mâu kăn ƀô̆ ƀă hnoăng cheăng mâu kăn ƀô̆ kong pơlê Dak Lak, tung 2 hơnăm hdrối nah, kong pơlê hiăng mơhnhôk tŏng kum châ lối 6,5 rơtuh dollars tiô tơdroăng mơdêk tơrŭm cheăng ƀă pơkâ mơdêk mơhnhôk tŏng kum pa kong chin phuh.

Tung mê, riân troh khế 8 hơnăm kố, Vi ƀan hnê ngăn kong pơlê hiăng kĭ pơkâ tơdah xo 51 kơxô̆ liăn tŏng kum ƀă tâi tâng krếo thế châ vâ chê 3,7 rơtuh dollars. Kơvâ cheăng liăn kum ki hên cho ‘na khăm pơlât, hnê hriâm, kong kế tơmeăm khoăng, mơnhông mơdêk cheăng kâ rêh ối pơlê pơla ƀă pơkâ tơleăng mâu tơdroăng ‘na pơlê pơla.

Peăng kong pơlê, pôa Võ Văn Cảnh, kăn phŏ hnê ngăn Vi ƀan kong pơlê Dak Lak tối nhên, Dak Lak đi đo hbrâ rơnáu pro tơ’lêi hlâu má môi vâ mâu khu tơrŭm, khu ki tŏng kum kong têa ê tơrŭm, tŏng kum kong pơlê tung la ngiâ.

VOV Tây Nguyên/Tơplôu: Katarina Nga