Pơtối mê, mâu ngế pêi cheăng 2 khu cho kăn teăng mâ khu râ kăn pơkuâ mâu khu, kơvâ cheăng dêi kong pơlê Dak Lak. Hnoăng cheăng dêi 2 khu cho séa ngăn tơnêi tơníu mâu tíu ok tơnêi hmốu pơtân kum tung mơjiâng tơdroăng tơkêa bro mơjiâng pro troăng kân ăm phêp rơxế kơtâu têi Khánh Hòa - Ƀuôn Ma Thuột, mê cho Tơdroăng tơkêa bro hên tơmeăm kơxô̆ 2 ƀă 3, xua Khu pơkuâ tơdroăng tơkêa bro 6 – Khu xiâm pơkuâ troăng prôk ƀă rơxế kơtâu; Khu pơkuâ tơdroăng tơkêa bro mơ’no liăn cheăng mơjiâng tơmeăm troăng klông ƀă pêi chiâk deăng mơnhông thôn pơlê kong pơlê Dak Lak pơkuâ mơ’no liăn cheăng.

Mâu khu séa ngăn thế pôu râng tâi tâng hnoăng a ngiâ Vi ƀan kong pơlê tung tơdroăng séa ngăn, tơkŭm tâi tâng, tơbleăng, pơkâ thế Vi ƀan kong pơlê (ing Khu pơkuâ kế tơmeăm khoăng ƀă kong prâi) môi tuăn lơ ôh tá môi tuăn pơkâ tơ’nôm mâu tíu pơtân kum mơjiâng pro tơdroăng tơkêa bro, thế kêi đeăng hdrối hâi lơ 29/5/2024.