Gô̆m dêi nhâ ‘măn tung kơdroăng ro, ngoh Y Hen Niê, ối a buôn Yông Ƀ, cheăm Ea Drơng, tơring Čư̆ Mgar phiu ro tối ăm ‘nâi, kố cho “Ki xiâm tơdroăng cheăng pêi” kum rơpŏng ngoh vâ hluăn ing kơtiê sap ing mơ’nui hơnăm nah. Ing 7 hơnăm hdrối, rơpŏng ngoh kơnôm châ tơring tŏng kum 40 rơtuh liăn vâ mơjiâng pro hngêi tuăn pâ. Môi hơ’năm kơ’nâi mê, Vi ƀan hnê ngăn Măt trâ̆n Tơnêi têa cheăm pơtối tŏng kum liăn vâ rôe khu ro kơdrâi păn la ngiâ vâ ga ai kuăn.

Hmôu pơ tiah mê, tung 6 hơnăm hiăng luâ, rơpŏng ngoh rak ngăn hiăng châ ai 5 to ro, tê dêi kuăn ro, châ xo eâk ga vâ rơvât ăm xiâm loăng kơphế. On veăng ngoh xuân hiăng djâ dêi pó kơdo mơ-eăm pêi cheăng kâ, păn roăng, rak ngăn, hnê tối dêi kuăn ‘nĕng vâ tơniăn tung tơdroăng rêh kâ ối.

“Hdrối nah xahpá ó khât, kơtiê ó, la kơnôm châ ai tơdroăng tŏng kum dêi tơnêi têa, kum ‘na hdrê pêt, hdrê păn, môi tiah chu, ro, kum liăn mơjiâng pro hngêi ối. Ing tơdroăng tŏng kum mê, rơpŏng on veăng, kuăn ‘nĕng xuân kơhnâ khât tung pêi kâ, kơdo mơ-eăm mơnhông cheăng kâ. On veăng má xuân kơhnâ tung tơdroăng pêi lo hên kế tơmeăm, pêi cheăng tơ’nôm pá kong vâ mơnhông pêi cheăng kâ, ing mê, tơdroăng rêh ối hiăng chía tơniăn lĕm tâ. Á mơnê rêm râ pơkuâ hiăng tŏng kum”.

Xuân hiăng châ hluăn ing tơdroăng kơtiê a mơ’nui hơnăm nah, rơpŏng nâ H’BLip Niê ối a ƀuôn Yông hiăng mơ’no liăn rôe tơ’nôm 7 sào tơnêi chiâk kơphế vâ mơ-eăm pêi kâ. Nâ H’Blip Niê ai tối, khoh chiâng ai tơdroăng ki hơ’lêh mê cho kơnôm ing Măt trâ̆n Tơnêi têa cheăm veăng kum 3 to pu pái kăn ing mơ’nui hơnăm 2017.

“Rơpŏng á hdrối nah xuân trâm hên xahpá, ôh tá ai tơnêi pêi chiâk pêi deăng xua mê kơtiê xahpá ó khât. Kơnôm châ tơnêi têa kum hdrê pu pái mê á xuân kơhnâ mơ-eăm rak ngăn dêi pú pái, ing mê, khoh chiâng hluăn ing kơtiê xahpá. Ing kơxô̆ liăn ki tê pu pái, tê tơmeăm pêi lo ing chiâk deăng mê a rôe tơ’nôm tơnêi chiâk, pêt kơphế ƀă ing mê rế hía o rơdâ kê tâ tung pêi pêt kế tơmeăm vâ hluăn ing kơtiê xahpá”.

Túa kơdĭng liăn ngân ki tâ kơdĭng tung “Chu tơnêi” xuân châ po rơdâ tung lâp lu tơring Čư̆ Mgar kơnôm ai tơdroăng tŏng kum dêi kăn ƀô̆, đảng viên ƀă kuăn pơlê. Châ po rơdâ a mâu khu pơkuâ râ cheăng. Jâ H’Núi Niê, Kăn phŏ hnê ngăn Vâi kơdrâi tơring Čư̆ Mgar tối ăm ‘nâi, Khu vâi kơdrâi xuân mơhnhôk thế ai “Chu tơnêi” vâ rêm ngế tâ tung mê sap ing 1 rơpâu troh 20 rơpâu liăn rêm khế, vâi nâ o kơhnâ pêi pro tơdroăng ki kố.

“Tung mâu hơnăm hdrối mê hía nah, tơdroăng ki mơhnhôk rêm khu ngăn vâi kơdrâi ki iâ ai môi túa pêi pro vâ kơdĭng liăn, tung mê, xuân ai tơdroăng “Chu tơnêi” vâ tâ kơdĭng liăn. Ing tơdroăng cheăng ki kố, xuân kal po rơdâ hên túa cheăng, tung mê ai dâng 60% vâi nâ o cho hdroâng kuăn ngo ki iâ mơngế châ xúa ing túa pêi pro kố”.

Kơnôm ai tơdroăng tŏng kum dêi tâi tâng tơdroăng cheăng kal kí, túa cheăng ki păn “Chu tơnêi” hiăng chiâng tơdroăng cheăng ki châ po rơdâ lâp lu tung tơring Čư Mgar, ing mê, mơjiâng pro ivá troh a rơtal liăn vâ pơkâ tŏng kum ăm mâu rơpŏng kơtiê, vâ chê kơtiê ƀă mâu rơpŏng ki ai tơdroăng xahpá. Kơnôm tiah mê, troh nôkố, kơxô̆ rơpŏng kơtiê tung lâp tơring hiăng kơdroh hên, ối dâng 4,4%, rơpŏng vâ chê kơtiê ối dâng 7,5%, rêm ngế pêi lo châ lối 59 rơtuh liăn 1 ngế 1 hơnăm. Tơdroăng rêh ối dêi kuăn pơlê hiăng châ tơtêk iâ. Pôa Y Wen Hwing, Kăn phŏ hnê ngăn Vi ƀan tơring Čư Mgar tối ăm ‘nâi:

“Tơdroăng ki tŏng kum, rak ngăn tơdroăng rêh ối dêi kuăn pơlê a tơring Čư̆ Mgar, tơring hiăng pêi pro krâu kơhnâ khât ƀă ngăn mê cho môi tung mâu hnoăng cheăng ki xiâm vâ ing mê, rak ngăn ‘na pêi lo kế tơmeăm, mơnhông tơdroăng ki hloh hlê rơkê plĕng dêi kuăn pơlê, ki rơhêng vâ tối, ƀă mâu rơpŏng ki kơtiê xahpá, rơpŏng ai hnoăng tơnêi têa ƀă mâu rơpŏng xahpá, tiô tơdroăng pơkâ, ôh tá lôi ai kơbố ối pa rŏng.

 Pêi pro kơhnâ, rơkê tơdroăng hnê tối troăng pơkâ, troăng tơdjâ, troăng hơlâ dêi Đảng, túa pơkâ ‘na luât dêi tơnêi têa ăm kuăn pơlê. Hnê mơhno tối, po troăng hơlâ, ki malối ƀă mâu ngế tro hyông troăng vâ vâi hlê plĕng tro khât ƀă tơdroăng pêi pro tro vâ veăng kum kuăn pơlê rêh ối lĕm tro tung pơlê pơla”.

Tuá pêi pro ki tơ’lêi hlâu, rêm rơpŏng hngêi bu kal kơdĭng ing 1 rơpâu liăn rêm khế, la tơdroăng ki mê hiăng hlo ai pơxúa kân khât vâ kum ăm tơdroăng rêh kâ ối kuăn pơlê. Túa ki kơdĭng liăn a “Chu tơnêi” a tơring Čư̆  Mgar hiăng veăng kum tơniăn ăm tơdroăng rêh ối dêi hên rơpŏng a pơlê cheăm, maluâ cho mâu hdroâng kuăn ngo ki kơtiê xahpá, vâ chê kơtiê xahpá ƀă ai tơdroăng rêh ối ki pa puih. Kơnôm ing mê, vâi ki kố thăm rế loi tơngah troăng hơlâ, troăng tơdjâ dêi Đảng, rak ngăn, hnê tối vâ kơdo mơ-eăm mơnhông pêi cheăng kâ, hluăn ing kơtiê xahpá, ing mê, veăng mơnhông tơdroăng pêi cheăng kâ dêi pơlê cheăm tơná.