VOV4.Xơ Đăng - Hơnăm 2022, Kŏng ti ngăn on tơhrik Dak Lak hiăng xing xoăng vâ chê 285 rơtal liăn vâ mơjiâng 93 tíu ki hrik ‘no on tơhrik, tâp trăng, hnhâng troăng kơxái on tơhrrik. Maluâ trâm hên xahpá xua tơnêi tíu kân rơdâ, hơngế, mê tơdroăng ki po văng tơnêi tíu a mâu tơring, cheăm ối trâm hên xahpá, tung pơla mê, pơreăng COVID-19 xuân pơtối tâ tú, xua ti mê, Khu ngăn  ‘na on tơhrik kong pơlê Dak Lak đi đo ‘mâi rơnêu mâu hnoăng cheăng ăm i tơtro, tâp trăng hnhâng troăng kơxái on tơhrik tro tơdroăng, tro hâi khế  pơkâ.

Hơ’lêh kơxái hạ áp a cheăm Hoà Phú, pơlê kong kơdrâm Ƀuôn Ma Thuột

Troh nôkố, hiăng pêi pro klêi 30 tơdroăng, tâi tâng hiăng hnhâng troh 85 km troăng kơxái on tơhrik hạ áp, 15 tíu ‘măn kơmăi biê̆n ap, lối chât khu kơmăi ki chiâng mơ’no tơpâ xêh on ƀă khu kơmăi ki vâ rak vế, kring tơniăn tơmeăm  khoăng. Dế nôkố, Khu ngăn ‘na on tơhrrik kong pơlê Dak Lak pơtối thâ tâp trăng hnhâng troăng kơxái on tơhrrik vâ pơtối mơnhông tơdroăng cheăng kâ-rêh ối pơlê pơla a mâu tơring, cheăm.

Nhat Lisa tơplôu ƀă tơbleăng