VOV4.Xơ Đăng - Tung pơla achê kố, tung lâp tơnêi têa hiăng ai hên roh on chếo pro tro lŭp ó ‘na kuăn mơngế ƀă tơmeăm khoăng. Ki hên xiâm kối chiâng on chếo cho xua ti tit on tơhrik. Hbrâ mơdât tơdroăng on chếo kố, mâu tíu cheăng on tơhrik Dak Lak dế pêi pro rơdêi tơdroăng pơtâng tối, hnê mơhno kuăn pơlê mâu troăng xúa on tơhrik tơniăn, kơdĭng ƀă hbrâ mơdât mâu tơdroăng trâm xía vâ xua pro xôi rak tơniăn troăng on tơhrik cao áp.

Kŏng nhân kơvâ on tơhrik xing xoăng mơ-éa pơtâng tối rak tơniăn on tơhrik ăm kuăn pơlê

Môi tiah a Čư Kuin, rơtế ƀă tơdroăng pơtâng tối tung rơ’jíu mâu cheăm péa xôh môi khế, kơvâ on tơhrik hiăng xing xoăng mơ-éa ‘na xúa on tơhrik tơniăn, hlối pơtâng tối tơdrêng a mâu tíu xo liăn on tơhrik, a hngêi kuăn pơlê nếo krâ công-tơ; tơrŭm ƀă Tíu pơtroh kơthô mơhno khôi túa lĕm cheăm xing xoăng mơ-éa tung hâi xing xoăng liăn khế ăm mâu ngế hiăng pơtê cheăng xua hơnăm hiăng krâ rêm khế.

Kal đi đo séa ngăn mâu tơmeăm on tơhrik vâ hbrâ mơdât tơdroăng chếo pơtôu

Pơtối mê, kuăn pơlê châ hnê mơhno ‘nâi ki rơ-iô ‘na on tơhrik tung tơdroăng rêh ối rêm hâi ƀă mâu troăng hbrâ mơdât trâm xía vâ, môi tiah: đi đo séa ngăn troăng kơxái, mâu kế xúa on tơhrik, phich, kế ki pâk xo on tơhrik tung rơpŏng; tơpâ on tơhrik drêng ôh tá xúa; kŏng kơchoh ôh tá chiâng pêi a tơmeăm ai on tơhrik; ôh tá xúa on tơhrik vâ hbrâ mơdât tong, pế kơnái, hrik ká; ôh tá têng hmân ếo, mâu tơmeăm a mơnât ai troăng on tơhrik.

Kuăn pơlê xuân châ pơtâng tối ‘na rak tơniăn troăng on tơhrik , môi tiah: ôh tá hếo trăng on tơhrik lơ mot a kơpong rak vế tơniăn kơmăi klâ on tơhrik; ôh tá xah achê troăng kơxái on tơhrik; ôh tá krâ mâu tơmeăm lơ pêt loăng pro xôi kơtăn troăng kơxái on tơhrik ƀă hía hé.

A Sa Ly tơplôu ƀă tơbleăng