VOV4.Xơ Đăng - Ai hên ki pơxúa vâ mơnhông la troh nôkố ôm hyô Dak Lak xuân ối hngế ƀă tơdroăng loi tơngah. Kong pơlê dế mơeăm po rơdâ tơrŭm, tá tung kong pơlê ƀă tơrŭm ƀă kong pơlê ki ê vâ pro ivá ăm ôm hyô a kong pơlê mơnhông mơdêk.

Quảng Bình cho môi tung mâu kong pơlê rế tơrŭm ôm hyô ƀă Dak Lak xua mâu tơdroăng tơdâng ‘na loăng pơlái, kong kế, tíu rêh ối. Achê kố, 2 kong pơlê hiăng tơpui hên tơdroăng ‘na hriăn plĕng kơchơ tê mơdró, po troăng tơƀai kơneăng Đồng Hới – Buôn Ma Thuột ƀă hên tơdroăng tơrŭm ki ê tung 5 hơnăm la ngiâ. Pôa Đặng Đông Hà, Kăn phŏ pơkuâ Khu pơkuâ ôm hyô Quảng Bình tối, Dak Lak ƀă Quảng Bình rơtế ai troăng mơnhông mơdêk tung la ngiâ ôm hyô loăng pơlái kong kế, pơtê, laga xuân ai hên tơdroăng ki phá tơ-ê krê vâ mơnhông, mơjiâng chiâng inâi ôm hyô ki kơnâ:

“Rơtế ƀă mơjiâng tơmeăm ôm hyô mê thăm pêi pro rơdêi tơdroăng tơbleăng ôm hyô ƀă tơdjêp. Nôkố mê tơdroăng pơ’lêh xúa kơmăi kơmok mê tơbleăng, tơrŭm, marketing gá cho kal khât. Ƀă ki má mơ’nui nếo cho mâu khu mơdró xuân hbrâ ƀă mâu kơ koan pơkuâ tơnêi têa xuân thăm pêi pro tơdroăng pơkuâ tơnêi têa dêi tơná vâ pơkuâ tơtro mâu tơmeăm ôm hyô. Tơdrêng amê, xuân pro tơ’lêi hlâu ăm mâu khu tê mơdró vâ mơnhông mơdêk ôm hyô lĕm tro tâ’’.

Dak Lak kĭ tơkêa tơdroăng môi tuăn tơrŭm mơnhông mơdêk ôm hyô ƀă hên kong pơlê, pơlê kong kơdrâm

Hdrối mê, tung khế 3/2022, Khu pơkuâ ‘na Mơhno túa lĕm tro – Tơ’noăng ivá ƀă Ôm hyô kong pơlê Dak Lak xuân hiăng tơrŭm ƀă Khu pơkuâ Ôm hyô kong pơlê Khánh Hòa tơkŭm po Tơpui tơno pêi pro ăm rĕng tâ, mơđah tơbleăng ƀă tơdjêp tơmeăm ôm hyô. Jâ Nguyễn Thị Lệ Thanh, Kăn pơkuâ Khu pơkuâ ôm hyô kong pơlê Khánh Hòa tối ăm ‘nâi: tŭm 2 kong pơlê pơrá ai tơmeăm ki rơdêi krê vâ mơjiâng mâu tơmeăm ôm hyô, tâng môi tiah Khánh Hòa ai tơmeăm ki rơdêi krê ‘na ôm hyô têa kơxĭ rơlố mê Dak Lak pơtối má môi ƀă ôm hyô loăng pơlái kong kế, tíu lĕm mơnâ mâ ngăn, ngo ngối kong kế. kố cho tơdroăng ki tơ’nôm ăm dêi pó cho tơtro ăm tŭm péa kong pơlê, mơjiâng mâu tour hên ‘na tơmeăm ôm hyô ƀă mâu tơdroăng châ tâ ki má môi ôm hyô.

“Ngin kô hnê mơhno mâu kŏng ti ôm hyô xuân môi tiah cho tơrŭm ƀă Khu pơkuâ ôm hyô Nha Trang – Khánh Hòa đi đo tơdjêp vâ po rơdâ pêi pro tơrŭm kơpong, tơpui tơno đi đo, ai mâu tơdroăng mơgêi pơtân, mơgêi vâ mơnhên xo vế túa ki rơkê tơtro. Ing mê Khu pơkuâ ôm hyô xuân kô tơkŭm tâi tâng rơkong tơpui tối ƀă ai mâu tơdroăng pêi pro pơtối châ tơƀrê tâ hnoăng mơnhông mơdêk tơrŭm kơpong pơla Khánh Hòa ƀă Dak Lak’’.

Dak Lak ai hên loăng pơlái kong kế tíu mơnâ mâ ngăn

Rơtế ƀă ai tơmeăm ki ai hlâu loăng pơlái kong kế, Dak Lak u ối a tíu xiâm kơpong Tây Nguyên, tơ’lêi hlâu vâ tơdjêp ôm hyô ƀă mâu kong pơlê tung kơpong, ki malối cho ƀă mơngế rơtế kơtâu Lâm Đồng, kong pơlê hiăng mơjiâng châ inâi ôm hyô ô eăng ‘nâng. Jâ Nguyễn Thị Bích Ngọc, Kăn phŏ pơkuâ Khu pơkuâ mơhno khôi túa lĕm tro – Tơ’noăng ivá ƀă Ôm hyô Lâm Đồng tối ăm ‘nâi, péa kong pơlê dế mơ-eăm rak tơniăn mâu tơdroăng pá ‘na troăng klông, vâ ôm hyô păng ‘nâng châ tơdjêp:

“Nôkố lăm ing Lâm Đồng hluâ Dak Lak dâng vâ chê 200km, troăng prôk cho pá puât. Péa kong pơlê dế pơkâ tơdroăng tơkêa bro mơjiâng troăng ăm phêp rơxế kơtâu têi ing Lâm Đồng hluâ Dak Lak, ing mê tơdjêp ƀă mâu kong pơlê Tây Nguyên. Ƀă pói vâ rĕng pơ’lêh ƀă mơdêk, tơdrêng amê mơjiâng nếo troăng klông, pro tơ’lêi hlâu má môi ăm tơmối ôm hyô troh ƀă 5 kong pơlê Tây Nguyên.

Môi tơdroăng nếo mê cho mơjiâng môi pơkâ môi tuăn ‘na ôm hyô dâi lĕm, tơdrêng amê mơjiâng pơkâ vâ mơnhên ‘na mâu tơdroăng ôm hyô dêi tơná’’.

Tơdroăng mơhno khôi túa lĕm hên, hên mơngiơk dêi mâu hdroâng kuăn ngo a kong pơlê

Tiô pôa Đặng Gia Duẩn, Kăn phŏ pơkuâ ‘na mơhno túa lĕm tro – Tơ’noăng ivá ƀă Ôm hyô Dak Lak, ƀă 49 hdroâng mơngế dế rêh ối a kong pơlê Dak Lak ai mâu khôi túa lĕm tro hên, hên mơngiơk ƀă phá tơ-ê. Tung pơla kố nah, kong pơlê hiăng ai hên tơdroăng tơkêa bro ki nhên tơdjâk troh mơdêk ôm hyô, rak vế ƀă mơnhông mơdêk ki kơnâ mâu tíu chôu ‘măn tơmeăm khoăng ton nah xuân môi tiah Pơkâ tơdroăng cheăng ‘na rak vế khôi túa lĕm tro ‘na chêng koăng.

Hneăng hôp Đảng roh má 17 dêi kong pơlê xuân hiăng mơnhên mơnhông mơdêk ôm hyô cho môi tung mâu hnoăng cheăng xiâm. Kố cho mâu troăng hơlâ vâ tơdjêp mơnhông mơdêk khôi túa lĕm tro ƀă mơnhông mơdêk ôm hyô a kong pơlê.

Pôa Đặng Gia Duẩn tối:

“Ngin kô mơ-eăm pêi pro mâu tơdroăng cheăng kơjo, mâu tơmeăm ki lâi, mâu tíu ki lâi vâ mơnhông mơdêk tơtro mê tối mơhnhôk châ tơmối ôm hyô mê kô kơjo mơ’no liăn cheăng, mơhnhôk rế hía rế kơdrâm tâ tơmối ôm hyô ƀă hên mơngế mơ’no liăn cheăng a kong pơlê ing mâu tơdroăng pêi mê. Ƀă Dak Lak phá tơ-ê ƀă mâu kong pơlê ki ê a tíu ki lâi? Cho yôh ga thế khôi túa lĕm tro dêi vâi krâ hdroâng kuăn ngo tung kong pơlê, tung mê ai hên mâu hdroâng kuăn ngo tung pơlê ai khôi túa lĕm tro má môi ƀă tơrŭm ƀă mơnhông mơdêk ôm hyô, vâ pin pói vâ kơxô̆ liăn châ xo ing mơnhông mơdêk ôm hyô, gá kô veăng kum kal khât tung GDP dêi kong pơlê tung la ngiâ’’.

Ƀă hên tơmeăm ki ai hlâu vâ mơnhông hên tơdroăng ôm hyô, Dak Lak dế ai mâu troăng prôk vâ pêi pro ƀă mơdêk ôm hyô rơdêi păng ‘nâng. Tung mê, tơdroăng thăm tơdjêp, tơrŭm ƀă mâu kong pơlê, pơlê kong kơdrâm tung lâp tơnêi têa châ pói tơngah kô ivá xông rơdêi ăm ôm hyô, kum kơvâ kơmăi kơmok ôh tá ai ngôi kô mơjiâng hên ki kơnâ tâ ăm tơdroăng mơnhông mơdêk cheăng kâ, rêh ối pơlê pơla a kong pơlê.

H’Xíu H’Mok chêh

A Sa Ly tơplôu tơbleăng