VOV4.Xơ Đăng - Sap ing apoăng hơnăm troh nôkố, mâu tíu pêi cheăng on tơhrik a Dak Lak hiăng châ ‘nâi lối 1 rơpâu ngế pro xôi xúa on tơhrik. Tung mê krê tơdroăng ki tong on tơhrik châ hlo ai 58 ngế, tí tăng ƀă nâp kơxô̆ liăn lối 900 rơtuh liăn. Tơdrêng amê, mâu tíu pêi cheăng xuân hiăng mơdêk xúa mâu tơdroăng, phần mềm tơpui tối leăng kơxô̆ ki séa ngăn sap ing hơngế, hbrâ rơnáu séa ngăn tơdroăng ki hơ’lêh dêi kĭ, châ hlo mâu tơdroăng ki pêi pro ôh tá tro tung xúa on tơhrik dêi kuăn pơlê.

Ngế ki cheăng ‘na on tơhrik séa ngăn troăng kơxái ‘na rŏng công tơ tro tơtit kơxái a thôn 4, cheăm Ea Nam, Ea Hleo

Tơdroăng cheăng kố ối veăng kum kơdroh khât tơdroăng ki mơni kô trâm mâu tơdroăng ki ôh tá mơhúa ‘na on tơhrik tung tơdroăng rêh ối dêi kuăn pơlê. Hơnăm kố lâp kong pơlê hiăng châ ‘nâi 54 rôh ‘na kĭ on tơhrik tâk hên xua troăng ki mơ’no on tơhrik tro tơtit kơxái peăng ‘na rŏng công tơ, teăm tŏng kum kuăn pơlê ‘mâi rơnêu rak tơniăn on tơhrik.

Katarina Nga tơplôu ƀă tơbleăng