VOV4.Xơ Đăng - Hâi lơ 26/7, Khu hnê mơhno cheăng kong pơlê Dak Lak ‘na tí tăng, tơkŭm ƀă mơnhên inâi kơxêng kiâ mố đô̆i tơkŭm po rôh Hôp hnoăng cheăng tí tăng, tơkŭm kơxêng kiâ mố đô̆i khu lêng ki pleăng dêi hnoăng cheăng ƀă khu ki rơkê plĕng  Việt Nam hlâ tung rôh tơplâ xâ nah a Kul, rơnó tô hơnăm 2021 – 2022. Tiô tối tơbleăng a rôh hôp, klêi lối 4 khế tơbleăng khu lêng hiăng lăm ngi kong pơlê Mondulkiri, kong têa Kul, kăn ƀô̆, lêng Đô̆i K51 hiăng tí tăng, tơkŭm châ 15 to kơxêng kiâ mố đô̆i tá hâi ‘nâi inâi, tung mê ai 1 to kế tơmeăm cho loăng chêh, têa mâk ai krâ inâi (“Ngọc Chút-27-9-66).

Mâu đoàn viên têk on trĭng ƀă tâp nhăng a mâu tơnâp kiâ mố đô̆i

Tung pơla rôu, Đô̆i K51 hiăng râng vế krâu, mơnhên tro mâu kế tơmeăm dêi Mố đô̆i Việt Nam, tơdrêng amê hlối xo túa dêi mâu kơxêng kiâ mố đô̆i pơcháu ăm Khu ngăn cheăng pêi mố đô̆i tro rong ƀă rêh ối pơlê pơla kong pơlê Dak Lak tro pơkâ. Klêi kơ’nâi ăm 15 to kơxêng kiâ mố đô̆i vêh ngi kong pơlê, Khu pơkuâ Đảng, Vi ƀan hnê ngăn kong pơlê Dak Lak hiăng po kân krip tơkŭm mơdâm, pôu ngăn ƀă ‘mế kơxêng kiâ mố đô̆i a ilâng kiâ mố đô̆i kong pơlê.

A rôh hôp, Vi ƀan hnê ngăn kong pơlê Dak Lak xuân hiăng môi tuăn túa pơkâ, tơdroăng ki xiâm, pơtối pêi pro tơƀrê hnoăng cheăng tí tăng, tơkŭm, djâ vêh mâu kơxêng kiâ mố đô̆i mâu khu lêng ki pleăng dêi hnoăng ƀă mâu khu ki rơkê plĕng Việt Nam hlâ tung mâu rôh tơplâ a kong têa Kul.

Katarina Nga tơplôu ƀă tơbleăng