Đă tă Đinh Văn Hưng, Tỉnh ủi viên, Kăn pơkuâ ngăn Đảng ủi Khu pơkuâ ngăn lêng kong pơlê Dak Lak tối rơdêi, Ƀlêi trâng Buôn Ma Thuột cho tơdroăng ki bâ eăng dêi hiâm mơno tơplâ khên tơnôu, hlâ rêh, hiâm mơno khŏm mơ-eăm ƀlêi trâng dêi lêng ƀă kuăn pơlê pin. Tơdrêng amê hlối pơkâ thế kăn ƀô̆, mố đô̆i khu lêng kring vế kong pơlê pơtối mơdêk khôi hmâ, mơdêk tơdroăng ki rơkê plĕng tung hnê hriâm, hbrâ rơnáu tơplâ, mơjiâng khu lêng kring vế krá rơdêi, pêi pro châ tiô tơdroăng pơkâ thế tung tơdroăng nếo.

A Ilâng kiâ mố đô̆i kong pơlê Dak Lak, tíu ki ối tơniăn dêi lối 2.300 ngế mố đô̆i ki hlâ, tung tơdroăng ki ‘mâi hơtĭng, mâu kăn pơkuâ kong pơlê ƀă mâu kăn ki ê hiăng pleăng rơvĭng reăng, tâp nhăng a Um meăm tơbâ, mơdoh môi iâ phut tơbâ troh ƀă mơnê mâu ngoh ki hiăng hlâ xua tơdroăng cheăng tơplâ tơleăng lĕm hdroâng mơngế, pro tơnêi têa tơrŭm chiâng môi.

Pơtối mê, khu kăn lăm têk nhăng tơbâ mâu mố đô̆i kăch măng ki hlâ a Tíu xối tơbâ Tơnêi têa a Hngêi phâk Buôn Ma Thuột, tíu ki rup kroăng hên mâu ngế cheăng kal kí tung rôh tơplâ kăch măng mâu hơnăm apoăng chal XX ƀă cho tíu ki mơjiâng cho ƀô̆ Đảng apoăng dêi kong pơlê Dak Lak (ton).