Mot ối tung hngêi ki lĕm nếo bro klêi, nâ Nguyễn Thị Diệu Linh, pêi cheăng tung Khu pơkuâ ngăn lêng tơring Krông Bông, phiu ro tối, tơdroăng tơmiât châ bro hngêi dêi nâ sap ing hên hơnăm hdrối nah hiăng châ chiâng ai khât. Rơpŏng xơpá drêng kơnốu pêi cheăng hngế, nâ môi ngế rế pêi rế athế păn roăng dêi 2 ngế kuăn tơxĭn, tung mê ai 1 ngế muăn ôh tá chiâng tơpui ƀă kơbố.

Tâng ôh tá ai tơdroăng tŏng kum dêi mâu vâi pú, ƀă 50 rơtuh liăn sap ing liăn ‘măn kơdĭng pêi pro tiô rơkong Pôa hnê xua Khu pơkuâ ngăn Đảng Krông Bông diâp ăm, mê ôh ti ‘nâi drêng lâi nâ nếo kâi châ bro hngêi.

“Hlo phiu ro khât, hơniâp xua châ tơdroăng tŏng kum dêi rêm râ pơkuâ cheăng, mâu ngoh nâ tung kơ koan, bro hngêi ki mâu nhŏng o veăng kum môi tiah kố vâ hmiân tuăn pêi cheăng. Á hlo tơdroăng kố gá pơxúa khât, bro ăm á loi tơngah, kơdroh tơdroăng ki tơbrêi tơbrêh, xơpá sap ing nah, kum á tơkâ luâ mâu tơdroăng xơpá vâ mơ-eăm hmiân tuăn păn roăng kuăn ‘nĕng”.

Xuân phiu ro drêng châ xo 20 rơtuh liăn sap ing Khu râng liăn kơdĭng pêi pro tiô rơkong Pôa hnê, nâ Trần Thị Vân, a thôn 2, cheăm Hòa Thành, tơring Krông Bông hiăng bro kế ki hding tôu mêi ‘na ngiâ hngêi ƀă a hang lơng hngêi, bro tíu xah hêi ăm dêi kuăn kơnốu teăng ăm bu ối to tung hngêi ki hâ ho. Kuăn kơnốu nâ tơdjâk ing rôh tơngê ‘na ngoâ, hiăng 7 hơnăm la ôh tá ‘nâi klâi.

“Hên hơnăm xuân hiăng pơlât ăm muăn a hên tíu mê liăn ngân xuân hiăng ôh tá ai xếo, kố nah châ tơdroăng tŏng kum dêi tơdroăng pêi pro tiô rơkong Pôa Hồ hnê mê á phiu ro khât, vâ bro hang lơng ƀă bro tơ’nôm kơnâng ki xŏn vâ ăm muăn xah kơtâu lo pa gong ngăn mâu kế tơmeăm tâ tá. Xua muăn ối to tung hngêi, rêm rôh nôu vêh pêi cheăng hlo ai kuăn mơngế mê muăn ro khât, rơpŏng á mơnê hên khât”.

Nâ Linh prếi nâ Vân cho péa tung kơxô̆ lối hrĭng ngế đảng viên, kuăn pơlê châ tŏng kum sap ing Khu râng liăn pêi pro tiô rơkong Pôa hnê a tơring Krông Bông. Kố cho kơxô̆ liăn xua Khu pơkuâ ngăn Đảng tơring Krông Bông tơbleăng sap ing hơnăm 2016. Tiah mê, rêm kơ koan, khu tơrŭm, chi ƀô̆ mơhnhôk kăn ƀô̆, đảng viên, kuăn pơlê pêi pro kơdĭng iâ hlái sap ing 2 rơpâu troh 20 rơpâu liăn rêm khế vâ ‘măn kơdĭng, kum mâu ngế ki malối xơpá a tơring. Ƀă túa pêi kố, tơdroăng kố hiăng mơhnhôk châ vâ chê 4 rơtal liăn.

Troh nôkố, Khu pơkuâ hnê ngăn Đảng tơring Krông Bông hiăng pơcháu 100 to ro kơdrâi, kum bro 14 toăng hngêi, bro 1 toăng hngêi ối tơdjuôm a hngêi trung Ea Rớt (cheăm Čư̆ Pui), kum mâu rơpŏng ki tro lŭp kế tơmeăm xua kong tô mơdrăng, mâu rơpŏng ki xơpá, tro châi tamo ƀă hên ki ê. Jâ Hồ Thị Đào, Kăn phŏ khu pơtâng tối tơdroăng kal Khu pơkuâ hnê ngăn Đảng Krông Bông ăm ‘nâi, tơdroăng kố cho tơdroăng cheăng pêi pro ai pơxúa hriâm tâp ƀă pêi pro tiô troăng tơdjâ, hiâm mơno túa rêh ối Hồ Chí Minh, kum bro tơdjâk troh lâp lu tơdroăng pơkâ 05 dêi Khu xiâm pơkuâ tơdroăng kal kí troh rêm rơxông kuăn pơlê.

Tung pơla tơbleăng, tơrêm hneăng, Khu pơkuâ ngăn Đảng tơring mơnhên rêm khu ki châ tŏng kum athế kum liăn ăm vâi. Kơxô̆ liăn châ xúa tiô túa ki tơtro rơkê, tơdrăng, tro ngế ki châ tŏng kum châ po rơdâ ƀă pơkuâ tơtro. Kơnôm mê, tơdroăng kố hiăng châ hên kuăn pơlê, kăn ƀô̆, đảng viên, pêi pro kơhnâ.

“Tung la ngiâ ah, hriăn ngăn tơdroăng kố hôm ai pơxúa khât há vâ tŏng kum môi iâ kum mâu rơpŏng ki xơpá a tơring. Tiô tối hdrối klêi kơ’nâi ‘no tâi liăn ‘măn kơdĭng kố mê apoăng khế 7/2023 Khu pơkuâ ngăn tối tơbleăng tơdroăng kal kô pơtối veăng tí tăng ‘nâi plĕng ăm Đảng ƀô̆ tơbleăng bro môi tơdroăng kơdĭng nếo vâ koh tơdah Hneăng hôp Đảng rêm râ pơla hơnăm 2025 – 2030”.

Ôh ti xê veăng kum nhên pro hơ’lêh tơdroăng pơkâ 05 dêi Khu xiâm pơkuâ tơdroăng kal kí troh rêm rơxông kuăn pơlê, tơdroăng Kơdĭng liăn pêi pro tiô rơkong Pôa hnê a Krông Bông hiăng bro pơxúa tơƀrê khât, kum hên ngế ki pơxúa. Kố cho tơdroăng pêi ki ai pơxúa lĕm vâ rêm ngế kuăn pơlê pơrá chiâng vâ veăng tơdjuôm ivá, bro tơdjâk tơdroăng ki lĕm tro tung hriâm tâp ƀă pêi pro tiô troăng tơdjâ Hồ Chí Minh, tung tơdroăng rêh ối rêm hâi rế hía rế tro tâ.