Kơxo lơ 16/5, Khu lo tŏng veăng kong pơlê Dak Lak tơkŭm po leh mơhnhôk Khế tŏng kum mơngế xahpá hliăng tiâ hơnăm 2023, leh tơbâ 160 hơnăm mơjiâng tơdroăng tŏng kum Khu lo tŏng veăng ƀă Trăng lưỡi liềm đỏ lâp plâi tơnêi. Ƀă mâu tơdroăng môi tuăn mơhnhôk, Khu hiăng tơdah châ lối 400 rơtuh liăn ing mâu tíu cheăng, khu pú hên ƀă ngế krê tŏng kum.

Khế tŏng kum mơngế xahpá hliăng tiâ hơnăm kố châ kong pơlê Dak Lak tơkŭm po mơhnhôk a 3 tíu cho tơring Krông Năng, Čư Mgar ƀă pơlê kong kơdrâm Ƀuôn Ma Thuột. Pơtối mê, tung roh ki pêi hên tơdroăng Khế tŏng kum mơngế xahpá hliăng tiâ cho khế 5 kố, mâu khu râ Khu lo tŏng veăng kô thăm pơtâng tối trâu hơngế tung mâu râ kuăn pơlê ‘na ki kơnâ tŏng kum, tơkŭm po mâu tơdroăng pêi, kơbông krếo mâu khu pú hên, ngế krê tŏng kum ăm khế tŏng kum mơngế xahpá, hliăng tiâ; diâp kơxuô tơmeăm, mơjiâng pro hngêi, rơnêu 1 tíu ‘’Hơniâp krúa lĕm – hmê kơhiâm’’ a mâu hngêi trung mầm non, râ má môi.

Tŏng kum ki vâ iâ má môi 1.000 tíu ăm mâu ngế ai tơdroăng rêh ối pá puât tung kong pơlê. A leh mơhnhôk, Khu lo tŏng veăng kong pơlê Dak Lak hiăng tơdah lối 400 rơtuh liăn ing mâu tíu cheăng, khu pú hên, ngế krê tung tâi tâng kong pơlê veăng tơlo, tŏng kum ăm mâu ngế pá puât.