VOV4.Xơ Đăng - Kơxê lơ 28/9, môi ngế kăn hnê ngăn Vi ƀan cheăm Ea Tul, tơring Čư Mgar, kong pơlê Dak Lak tối, tung cheăm kố nếo ai tơdroăng klâk têa pro péa ngế nhŏng o ki ai tơdrêng hlâ. Ki ăm ‘nâi mê cho 2 ngế o ối a ƀuôn Yao, cheăm Ea Tul, tơring Čư Mgar, kong pơlê Dak Lak. 12 chôu kơhâi dế lơ 28/8, nôu pâ prế Y Đ. ƀă Y L. ôh tá hlo dêi kuăn vêh kâ hmê, mê hiăng lăm tăng. Drêng troh a long têa ƀuôn Yao kơdrâ hlo hmân ếo ƀă yep dêi péa ngế ‘măn a pakĭng, mơni ai tơdroăng ôh tá mơhúa, mê hiăng krếo kuăn pơlê troh veăng kum.

Kơpong long têa ƀuôn Yao, tíu ai tơdroăng hlâ klâk têa

Tâng tối tơdroăng mê, hên ngế ƀă kuăn pơlê ƀă khu râ pơkuâ cheăm hiăng troh, veăng kum, tí tăng. Klêi 45 phut tăng, rêm ngế tăng hlo péa ngế muăn tung kong têa kơdâm têa, klêi mê tŏng kum rơpŏng hngêi ’no liăn, tơmeăm khoăng ‘mế péa ngế ki nế hlâ.

Tiô ăm ‘nâi, long têa ƀuôn Yao xua vâ tôh loăng plâi dêi kuăn pơlê tung kơpong. Long têa mê hiăng kâng kơnâng krá ai chêh tơbleăng pôi tá prôk drô  têa trâu rơ-iô. Laga xua rơhêng vâ xah, prếi Y Đ. ƀă Y L. xuân ối châ mot tung long mê chiâng ai tơdroăng sĭng khéa.

Gương tơplôu ƀă tơbleăng