Kơxo hâi lơ 28/6, ai lối 20.000 ngế hok tro a kong pơlê Dak Lak pơxiâm tơ’noăng hâi apoăng dêi hneăng tơ’noăng mơgêi hriâm râ má pái  hơnăm 2023.  Tiô tối tơbleăng dêi Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak, tung hâi tơ’noăng Ngữ Văn, lâp tung kong pơlê ai 62 ngế hok tro ôh tá troh tơ’noăng tung tâi tâng kơxô̆ 20 rơpâu 829 ngế hok tro chêh inâi tơ’noăng.

Ai 9/33 tíu tơ’noăng ai kơxô̆ hok tro veăng tơ’noăng châ 100%. Mâu tíu tơ’noăng châ po tơniăn, kơtăng, ôh tá ai hok tro xuân ôh tá ai kăn ƀô̆ ngăn tơ’noăng pro xôi luât pơkâ tơ’noăng. A rôh tơ’noăng peăng kơxo ing tơdroăng châ rak tơniăn, châ kring ngăn krâu khât, mâu lêng kring gak a mâu hngêi trung tơ’noăng hên tâ mâu hơnăm hdrối nah. Malối a tơring Čư̆ Kuin, cho tíu nếo klêi ai khu ‘mêi mot plâ pro 9 ngế kăn ƀô̆ ƀă kuăn pơlê hlâ, mâu lêng kŏng an kring gak a tung ƀă pa gong hngêi trung tơ’noăng vâ tơniăn ăm hneăng tơ’noăng.