VOV4.Xơ Đăng - Klăng leh tơbâ 75 hơnăm hâi Mô đô̆i rong râ - hlâ hía 27/7, hâi lơ 24/7, a cheăm Ea Kuang, tơring Krông Păč, Khu pơkuâ Đoân Droh rơtăm Dak Lak tơkŭm po tơdroăng ‘’Tơdroăng pêi rơxông ối nếo Dak Lak – Chêh pơtối tơdroăng hơniâp lĕm’’ ƀă hên tơdroăng ki kơnía.

Diâp mâu tơmeăm droh rơtăm mơjiâng pro

Mâu tơdroăng cheăng mê, môi tiah: trâm mâ tơpui tơno khôi túa ton nah ƀă mâu ngế cheăng kăch măng nah, mơngế ki veăng tơplâ xâ Mih tŏng kum tơnêi têa; lăm pôu Nôu Việt Nam khên tơnôu Trần Thị Lý; diâp kơxuô tơmeăm ăm 20 rơpŏng ai hnoăng tơnêi têa, pêt loăng a tíu koh tơbâ cheăm Ea Kuang, khăm pơlât, xing xoăng pơkeăng tê kơtê ăm kuăn pơlê pá puât. Rơnêu tíu meăn tơbâ a 2 cheăm Ea Kuang ƀă Ea Phê, tơring Krông Păč.  Tâi tâng kơxô̆ liăn pêi pro lối 70 rơtuh liăn.

Lăm kơ-êng mâu rơpŏng ai hnoăng tơnêi têa, mơngế ai hnoăng

Roh kố, mâu khu pơkuâ Đoân Droh rơtăm tơring ƀă Đoân droh rơtăm ối tung khu xuân pêi pro hên tơmeăm, tơdroăng cheăng ki kơnía klăng leh tơbâ 75 hơnăm Hâi mô đô̆i rong râ hlâ hía.

A Sa Ly tơplôu ƀă tơbleăng