VOV4.Xơ Đăng - Nôkố, kơchơ tê mơdró kơƀăn Trung thu tung kong pơlê Dak Lak hiăng pơxiâm tê mơdró ƀă tơdroăng phiu ro, kơdrâm kơdrĕng khu ngế ki po tíu tê. Mâu kơpong mơđah tơbleăng kơƀăn Trung ai hên mâu kơƀăn mơngiơk lĕm phá tơ-ê dêi pó pói tơngah môi rơnó Trung thu kơdrâm kơdrĕng, phiu ro klêi kơ’nâi luâ 2 hơnăm rơhĭng rơhối xua pơreăng COVID-19.

Lối 1 măng tĭng kố, a mâu troăng kơphô̆ xiâm dêi pơlê kong kơdrâm Ƀuôn Ma Thuột môi tiah Lê Thánh Tông, Lê Hồng Phong, Phan Bội Châu, Phan Chu Trinh… Hên tơmeăm tơbleăng tê kơƀăn Trung thu hiăng châ hbrâ, pro rơnuâ lĕm. Dế rah xo kơƀăn Trung thu vâ pro tơmeăm ăm dêi nhŏng o, pôa Bùi Minh Chánh, ối a bêng Tân Lợi, pơlê kong kơdrâm Ƀuôn Ma Thuột, kong pơlê Dak Lak ăm ‘nâi, mâu túa kơƀăn Trung thu ki ai inâi tê mê cho tơdroăng rah xo dêi rơpŏng hngêi pôa.

‘’Rêm hơnăm á hmâ rah rôe kơƀăn trung thu ki ai inâi tê, pêi krúa tơniăn, ‘nâi xiâm ki mơjiâng pro. A hlo hơnăm kố mâu kơƀăn kơnâ tâ iâ tâng vâ pơchông ƀă rêm hơnăm, túa rơnuâ pro lĕm tâ há, hên túa há’’.

Mâu khu rak ngăn tơdroăng tê mơdró séa ngăn kơƀăn trung thu pro a tíu pro tung pơlê kong kơdrâm Ƀuôn Ma Thuột

Hơnăm kố, mâu tíu tơbleăng tê tơdrêng dêi mâu tíu mơjiâng pro inâi ki kân môi tiah Kinh Đô, Yến Sào Khánh hòa, BiBica…  ƀă kơƀăn dêi kong pơlê pro tung rôh kố. Thành Phát mê ki hên tâ pro tê kơƀăn Trung thu rôh kố. Mâu kơƀăn ai hên túa pro. Pakĭng péa khu kơƀăn pro xiâm cho kơƀăn ki rơpâ rơmuăn ƀă kơƀăn pôh mê ối ai kơƀăn ôh tá tâ mâm ƀă kơƀăn pro ăm mâu ki pơrah kâ, ƀă ai tŭm túa ki hơ’lâk râm pro ƀă ăm xú lĕm môi tiah kloăng sen, prá ngiât, pôm hrốu, rơngá prăng, kloăng pía kái, tung tá gá pro rơpâ, tơvât hên ké, prá ngiât, chu pôh, ká jambon, í pôh jambon kơtâ í pro ‘măn ƀă po.

Ôh tá pơkâ thế pêi krúa lĕm tơrêm to koƀăn, mê mơngế ki rôe kâ rêm hâi ối rah hên tâ tung túa pro tơdrong tâ dêi kơhôp kơƀăn vâ pro tơmeăm ăm nhŏng o lơ pú hmâ tung rôh mê. Nâ Nguyễn Thị Bích Phượng, ngế rak ngăn tíu tê mơdró Ngọc Khánh 2, troăng Phan Bội Châu, bêng Tân Tiến, pơlê kong kơdrâm Ƀuôn Ma Thuột ăm ‘nâi.

“Péa hơnăm hdrối pơreăng tâ tú mê ngin ai iâ tê tơmeăm pro, la hơhnăm pơreăng tâ tú xuân hiăng tâi mê ngin hiăng rôe tơmeăm ing mâu tíu tê mơdró ki vâi ô eăng vâ pro kơƀăn tê ăm kuăn pơlê, môi tiah tơmeăm pro dêi Kinh Đô, Bibica ƀă Đông Khánh nếo’’.

Môi tíu tê kơƀăn Trung thu a troăng Lê Thánh Tông, pơlê kong kơdrâm Ƀuôn Ma Thuột

Hên ngế pơkuâ tê mâu kơƀăn ăm ‘nâi, ai tâk dâng 3.000-5.000 liăn/to tâng vâ pơchông ƀă rêm hơnăm.Tiô tơdroăng ăm ‘nâi ing Khu mơjiâng pro xua yă tơmeăm rôe vâ pro to kơnâ mê kơƀăn ki pro xuân to kơnâ há.

Tiô nâ Phan Thị Chúc Giang, ngế pơkuâ tíu tê mơdró kơƀăn kĕo Phương Hoa a troăng Y Jut, pơlê kong kơdrâm Ƀuôn Ma Thuột ăm ‘nâi, tâng vâ tối môi to kơƀăn Trung thu mê kơnâ ing 60-75 rơpâu liăn môi to. Ƀă mâu khu kơƀăn ki pro krúa lĕm mê kơnâ lối 3 rơtuh liăn/kơhôp (tung mê ai 4 to).Xuân tiô nâ Giang, pơla kố, mơngế rôe iâ:

“Tíu tê mơdró ngin hiăng tê mơdró ton lối 10 hơnăm kố, tâng vâ pơchông ƀă hơnăm nah, mê hơnăm kố mâu kơƀăn to kơnâ iâ, troh nôkố kơlo tê xuân hâi tâk, púi vâ ối péa pái hâi ah nếo kô tâk hên tâ mơngế rôe’’.

Vâ kring vế mơngế rôe xúa tung rôe mâu tơmeăm ƀă mâu khu tơrŭm, mâu ngế, khu tê mơdró ki pêi cheăng tơdrăng lĕm, Khu xiâm rak ngăn ‘na tê mơdró kong pơlê Dak Lak dế po rôh lăm séa ngăn tơdroăng hdrối, ƀă tung pơla ƀă klêi Tết Trung thu hơnăm 2022. Tơdrêng amê, troh apoăng khế 9 kong pơlê Dak Lak kô tơkŭm po nếo péa khu lăm séa ngăn dêi pơkâ cheăng a 6 tơring, pơlê kong krâm, kong kơdrâm ngăn tơdroăng hôp rak vế pêi pro tro mâu tơdroăng pơkâ dêi luât ‘nâ pêi krúa tơniăn kế kâ dêi mâu tíu mơjiâng pro tê mơdró tung kong pơlê.

Pôa Trần Văn Tiết, Kăn phŏ ngăn ‘na rak krúa kế kong pơlê Dak Lak, ăm nâi:

“Ngin kô tơkŭm séa ngăn ƀă mâu tơmeăm tê ki châ tê hên tung rôh Têt Trung thu môi tiah kơƀăn kía, kĕo, drôu, ƀiêr, têa ngeăm. Ngăn tiô kơ tơrêm tơdroăng kal mê kô ai tơdroăng pơxâu phâk pơrá phá tơ-ê tiô pơkâ. Ƀă mâu tíu pêi pro ôh tá ai tŭm hlá mơ-éa ăm phêp kô pơxâu phâk tiô tơdroăng ki ôh tá ai hlá mơ-éa ăm phêp, klêi mê mâu tíu pêi pro ai hlá mơ-éa phêp pro tŭm tiô pơkâ tơniăn krúa kế kâ la ôh tá vâ tơbleăng tơmeăm mê xuân tro pơxâu phâk xua pro xôi ôh tá vâ tơbleăng.

Tung pơla pêi pro tâng dêi tơná ai xúa tơ’nôm mâu tơmeăm ki râm ƀă ki ôh tá krúa kô tơkŭm a tơdroăng xôi pơxâu phâk tâi tâng tŭm tơdroăng xôi’’

Nam Trang chêh

Gương tơplôu tơbleăng