Kong pơlê Dak Lak hiăng tơbleăng pêi tơdroăng cheăng ki hbrâ rơnáu ăm rôh tâ phĭu kơtăng, rak tơniăn tro ƀă tro hâi khế pơkâ. Vi ƀan Tâ phĭu kong pơlê hiăng tơbleăng inâi ki păng ‘nâng cho 25 ngế to briât to pro kăn Kuô̆k hô̆i hneăng XVI a 5 tíu tâ phĭu vâ pôk xo 15 ngế kăn cheăng tung Kuô̆k hô̆i; 141 ngế to briât to pro kăn Hô̆i đong hnê ngăn kong pơlê a 27 to tíu tâ phĭu vâ pôk xo 84 ngế kăn cheăng tung Hô̆i đong hnê ngăn kong pơlê hneăng XI, pơla hơnăm 2026 - 2031.

Tiô jâ Cao Thị Hòa An, Kăn hnê ngăn Hô̆i đong kong pơlê, Kăn hnê ngăn Vi ƀan Tâ phĭu kong pơlê Dak Lak, tung pơla ing nôkố troh hâi lơ 15/3/2026 cho hneăng ki kal ki mơ’nui, ai pơxúa pơkâ tung tơdroăng ki hbrâ rơnáu ăm mâu tơdroăng pêi pro ki kal dêi rôh tâ phĭu. Xua mê, jâ pơkâ thế mâu khu pơkuâ hnê ngăn cheăng Đảng, kơ koan, tíu pêi cheăng ƀă kong pơlê kal mơdêk hiâm mơno pôu râng dêi hnoăng cheăng, hbrâ rơnáu, pêi pro kơtăng tung pơkuâ, hnê mơhno, rak vế tơniăn tro mâu tơdroăng pơkâ tung rôh tâ phĭu châ tơbleăng tro hâi khế pơkâ.