Dak Lak nôkố ai tơnêi kong kế, kơxô̆ kuăn pơlê dêi khu mâu kong pơlê, pơlê kong kơdrâm dế ối má môi tung lâp tơnêi têa, pakĭng mê, cho xiâm troăng prôk ki kal dêi Tây Nguyên; ai tơdroăng rêh ối cheăng kâ tơ’lêi hlâu vâ tơrŭm, tơdjêp mơnhông tơƀrê, pro xiâm ki mơdêk tơrŭm mơnhông cheăng kâ, túa lĕm tro, rêh ối pơlê pơla mâu kong pơlê tung kơpong Tây Nguyên, kơpong kĭng têa kơxĭ Tơdế tơnêi têa  ƀă mâu tíu xiâm cheăng kâ kân dêi lâp tơnêi têa.

Cheăng kâ mơnhông tơƀrê, pơtối rak ki tâk hên dâ dâng châ 8% tung hơnăm tung plâ 20 hơnăm achê kố. Malối, Dak Lak ối tơkŭm hên ki tơviah ‘na ki pơxúa mơhno túa lĕm tro, túa tơlá ton nah dêi kuăn pơlê 49 hdroâng kuăn ngo rêh ối tơdjuôm, tung mê, ai “Tơdroăng lĕm tro ‘na tôu chêng tôu koăng Tây Nguyên’’ châ UNESCO mơnhên cho tơmeăm kơnía ton nah túa lĕm tro dêi hdroâng mơngế.

Nếo achê kố, troh veăng leh ƀă tơbleăng a Leh tơbâ 120 hơnăm Dak Lak mơjiâng ƀă mơnhông, pôa Nguyễn Hòa Bình, Ngế pro xiâm phŏ hnê ngăn tơnêi tối: ki rơdêi ki kal, troăng hơlâ dêi kong pơlê Dak Lak ƀă kơpong ƀă tơnêi têa châ mơhnho nhên tung hên troăng rơhlâ, luât pơkâ dêi Tíu xiâm tơnêi têa ing mâu rơxông. Ki ăm hlo nhên cho Mơgêi kơxô̆ 67 dêi khu xiâm Kal kí ‘na “Mơjiâng  ƀă mơnhông pơlê kong kơdrâm Ƀuôn Ma Thuột, kong pơlê Dak Lak troh hơnăm 2030, hnoăng cheăng vâ pêi troh a hơnăm 2045”; Pơkâ kơxô̆ 72 dêi Kuô̆k hô̆i  ‘na luât pơkâ, luât tŏng kum ki pơkâ mơjiâng, mơnhông kơphô̆ pơlê kong kơdrâm Ƀuôn Ma Thuột chiâng kơphô̆ ki xiâm kơpong Tây Nguyên; pơkâ kơxô̆ 23 dêi Khu xiâm kal kí ‘na troăng hơlâ mơnhông cheăng kâ - rêh ối ƀă tơniăn cheăng lêng, kring tơniăn kơpong Tây Nguyên troh hơnăm 2030, tơdroăng vâ pêi troh hơnăm 2045... mơhno ivá pêi kân châ pơcháu ăm kong pơlê Dak Lak pêi cho mơnhông cheăng kâ thế tơtro ƀă túa lĕm tro, pơlê pơla, hyôh kong prâi, cheăng lêng, kring tơniăn; tơdrêng amê, thế cho tíu xiâm, ki mơdêk dêi tung kơpong.

Pôa Nguyễn Hòa Bình Ngế pro xiâm phŏ hnê ngăn tơnêi têa tối nhên, vâ pêi klêi mâu pơkâ, tơdroăng cheăng pơcháu, kal thế Đảng ƀô̆, mâu kăn ƀă Kuăn pơlê mâu hdroâng kuăn ngo tung kong pơlê thế môi tuăn dêi pó, mơ-eăm, tơkŭm pơkuâ hnê mơhno pêi tro mâu tơdroăng cheăng ki kal tiah kơ’nâi kố:

“Mơhnhôk ivá rơdêi tơkŭm, tăng ‘nâi plĕng tơƀrê tơmeăm khoăng, ki tơ’lêi hlâu mơnhông, mơdêk rơdêi ivá mơdêk; hơ’lêh nếo túa cheăng kâ, ki kal cho mơnhông mâu tơmeăm pêi lo ing chiâk, loăng loăng tơmeăm ai hlâu, ki hên, lĕm tơƀrê, tê ăm kong têa ê hên; mơdêk tơdroăng pêi chiâk uâ pơliê kế tơmeăm pêi lo ing chiâk, pro tơmeăm ƀă loăng, pro hngíu ká xi xŏng ƀă pro on tơhdrik’ mơjiâng khu cheăng kal kí krúa lĕm, rơdêi, xua kuăn pơlê pêi cheăng kum kuăn pơlê; mơnhông cheăng kâ - rêh ối, kring vế hyôh kong prâi, tơniăn rêh ối pơlê pơlê; tơniăn cheăng lêng, kring tơniăn pơlê pơla’’.

Pôa Nguyễn Đình Trung, Ngế cheăng tung tíu xiâm Đảng, Kăn hnê ngăn Đảng kong pơlê Dak Lak ăm ‘nâi, troăng vâ pêi la ngiâ, pa kĭng mâu rôh ki tơ’lêi hlâu ki xiâm, Dak Lak xuân dế hên tơdroăng xơpá, pơloăng mơnúa, kal thế tâi tâng khu cheăng Kal kí tung kong pơlê pơtối tơbâ mơnhông, pơtối rak ki rơdêi tuăn mơno pâ nhoăm tơnêi têa, ivá rơdêi tơrŭm môi tuăn tâi tâng hdroâng kuăn ngo, tăng tơmeăm khoăng ai hlâi, tơ’lêi mơnhông; mơdoh drêng rôh ai Đảng, Tơnêi têa tơmâng veăng kum khu mơdró ƀă mâu khu râ kuăn pơlê; tơmâng hnê nhên, tâi tâng, tŭm tơdroăng ƀă pêi kơtăng mâu troăng ki pơkâ “Mơnhông cheăng kâ cho tơdroăng ki xiâm, mơjiâng Đảng cho hnoăng cheăng pêi ki kal khât, mơjiâng khu cheăng kal kí krúa lĕm rơdêi, iâ mơngế, pêi cheăng tơƀrê, rah vế ƀă mơnhông túa lĕm tro vêa vong dêi kuăn ngo cho xiâm ki tơrŭm dêi pơlê pơla, xiâm ki mơhnhôk ‘na mơnhông krá tơniăn; khu lêng kring vế tơniăn pơlê pơla cheăm bêng tíu tơkăng kong tơnêi têa cho hnoăng cheăng pêi ki kal, pêi mô mơnê”.

“Đảng ƀô̆, mâu kăn, mâu lêng ƀă kuăn pơlê mâu hdroâng kuăn ngo kong pơlê Dak Lak pâ kô pơtối tơbâ tơdroăng hmâ pêi pro ki lĕm ing ton nah dêi kăch măng tơplâ khên tơnôu ƀă hiâm mơno pâ dêi  tơnêi têa; nhoăm ƀă rak vế mâu hnoăng hiăng pêi châ tơƀrê ki mâu pâ pôa hiăng hnê pêi ing nah; tơrŭm môi tuăn, tơdjuôm ivá môi mơno, mơ-eăm tơkâ luâ xơpá, pơloăng mơnúa, mơ-eăm mơjiâng kong pơlê Dak Lak mơnhông rĕng, krá rơdêi, rế kro mơdrŏng lĕm, rơkê plĕng, túa lĕm tro, veăng pro xiâm krá tơniăn tơdrêng ƀă lâp tơnêi têa pơxiâm mot tung mâu rơxông nếo, rơxông mơ-eăm tơná dêi hdroâng mơngế Việt Nam ".

 Pơtối rak vế tơmeăm khoăng, ki  ai hlâu dêi kơpong tơnêi kro mơdrŏng ing ton nah, tơkŭm ki pơxúa kơnía túa lĕm tro ton nah dêi mâu hdroâng kuăn ngo ing mâu kơpong tung lâp tơnêi têa; tíu ki kal ƀă cho tíu xiâm  mơnhông  kơpong Tây Nguyên; ƀă mâu tơnêi tíu kong ké tơmeăm khoăng ai hlâu, kong pơlê Dak Lak dế mơ-eăm mơnhông mơjiâng kong pơlê rế kro mơdrŏng, rak túa lĕm tro, rơkê plĕng, hơniâp ro./.