Xông tơpui a roh trâm mâ, pôa Tô Lâm, Kăn xiâm pơkuâ hnê ngăn Đảng mơnhên, kô mơ-eăm tâi ivá tơná, pêi kêi đeăng lĕm tro hnoăng cheăng dêi ngế Kăn teăng mâ kuăn pơlê kong xiâm, vâ tơxâng ƀă tơdroăng pói vâ ki kuăn pơlê loi tơngah.

‘Na tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro, mơ’nhiê liăn tê kơtê, kăn xiâm pơkuâ hnê ngăn Đảng mơnhên, xuân pơtối pêi pro kơtăng, pêi a kơlo ki má môi, ki rơhêng vâ tối klêi kơ’nâi Khu xiâm kal kí, Khu pơkuâ hnê ngăn cheăng Đảng pơkâ djâ tơ’nôm tơdroăng xiâm hbrâ mơdât mơ’nhê tê kơtê tung hnoăng cheăng dêi Khu hnê mơhno Tơnêi têa ‘na hbrâ mơdât kâ kơhveăm liăn ngân, tơdroăng ki ôh tá lĕm tro.

Xuân a roh trâm mâ, Kăn xiâm pơkuâ hnê ngăn Đảng hiăng tiâ mâu troăng tơmiât dêi kuăn pơlê, tơdrêng amê pơkâ thế Khu râ kăn teăng mâ Kuô̆k hô̆i Pơlê kong kân Hà Nội tơrŭm ƀă mâu kơ koan dêi pơlê kong kân mơnhên tâi tâng rơkong pâ thế dêi kuăn pơlê, séa ngăn mâu tơdroăng xiâm vâ pâ thế mâu kơ koan ai hnoăng dêi Tơnêi têa ƀă Kuô̆k hô̆i tơleăng.