Kố cho môi tung mâu tíu mơđah tơbleăng um tơmeăm ton nah dêi Lêng ki kân má môi ƀă ton má môi Việt Nam, ƀă hnoăng cheăng ki kal tung tơdroăng ‘măn rak ƀă pơtối rak ki kơnía ton nah dêi lêng dêi hdroâng mơngế. Sap hơnăm 2020, Khu xiâm pơkuâ ngăn lêng hiăng tơbleăng mơjiâng Tíu mơđah tơbleăng um tơmeăm ton nah dêi lêng Việt Nam a tơnêi ki vâ chê 39 ha tung pơlê krâm peăng hdroh Từ Liêm, Hà Nội; troh nôkố hiăng pro kêi rôh má 1 ƀă hiăng po tơdah tơmối mot ngăn.  

Tơbleăng a rôh pêi cheăng, Kăn xiâm pơkuâ hnê ngăn Đảng tối lĕm ‘nâng ‘na tíu ‘măn tơbleăng ƀă hên mâu tơmeăm, mơhno ki krip, tơviah tơƀrê dêi khu Lêng kuăn pơlê Việt Nam khên tơnôu. Tối nhên, kố cho tíu ki kal vâ hriâm, tăng ngăn vâ ‘nâi plĕng rơtế ƀă tơdroăng kring vế tơnêi têa ki khên tơnôu dêi pâ pôa pin nah, malối mâu tơdroăng hnê mơhno  rơkê dêi Đảng pin tung tơrêm rơxông mơnhông tơnêi têa, Kăn xiâm pơkuâ hnê ngăn Đảng xuân pơkâ thế mâu khu xiâm kơvâ cheăng ƀă pơlê kong kân Hà Nội pơtối pro tơ’lêi hlâu ăm Khu xiâm pơkuâ ngăn lêng rĕng pê klêi mâu tơdroăng ‘no liăn cheăng rôh má 2 dêi tíu mơđah um tơmeăm.