Cho đảng viên hơnăm ối nếo tơkŭm hôp a Chi ƀộ thôn Dà Nghịt 1, cheăm Lát, tơring Lạc Dương, kong pơlê Lâm Đồng, ngoh Cil Ha Sip, kuăn ngo K’Ho hiăng rĕng hnê mơhno pêi tơdroăng pơkâ 34 dêi Khu Kăn Đảng kong pơlê Lâm Đồng, pơtối rak hnoăng cheăng pêi, rơkê ƀeăn, hriăn plĕng ki nếo, khên tơmiêt, khên pêi xua vâ pro pơxúa tơdjuôm dêi kuăn pơlê.  Cil Ha Sip kơhnâ pêi chiâk, xua túa pêi pêt kơphế tiô troăng hơlâ krá tơniăn ƀă mơhnhôk kuăn pơlê tung cheăm, tơring pêi ƀối. Nôkố cheăm Lát hiăng mơjiâng Khu pêi cheăng tơrŭm pêt kơphế krúa, ƀă chât rơpŏng kuăn pơlê cho mơngế kuăn ngo veăng pêi tiô đơn chêh vâ rôe tơmeăm.

“Klêi châ hnê pêi pro tiô pơkâ 34 ‘na mâu tơdroăng ki đảng viên kal pêi ƀă mâu tơdroăng ki đảng viên thế ví a hiăng xua pêi pro tung rêh ối dêi tơná. Mơhno troăng ki lĕm vâ mơngế tung rơpŏng hngêi, nhŏng o ƀă rêm ngế ki ối rơtâ tá pêi ƀối”.

Xuân môi tiah Cil Ha Sip, mâu đảng viên dêi Chi ƀô̆ thôn Păng Tiêng, cheăm Lát xuân hlê nhên hnoăng cheăng tơná ngế ki djâ troăng a hdrối dêi đảng viên tung pêi pro tiô Hnê mơhno pơkâ 34 dêi Khu pơkuâ cheăng Đảng kong pơlê Lâm Đồng. Tiô pôa Rơ Ông K’Thiên, kăn hnê ngăn Chi ƀô̆ Păng Tiêng pakĭng 4 tơdroăng kal ví: mê cho ví pro xôi, lơ tăng pơxúa krê ăm tơná; lơ ví tơdroăng cheăng tơná la pơcháu ăm mâu ki ê pêi, xâu hnoăng cheăng pêi; ví pêi cheăng hmâng vâ ôh tá khât, ôh tá pro pơxúa; rak tro hnoăng tơná, pôi tá pro tơdroăng ki lâi luâ tơdroăng, rêh ối tơniăn lĕm ƀă vâi pú... mâu đảng viên tung chi ƀô̆ xuân pơtối pêi tro 3 tơdroăng kal thế pêi, mê cho: Tơpui hlối pêi, pêi tơdroăng ki tro xua vâ pro pơxúa tơdjuôm, pêi tâi hnoăng cheăng, mơ-eăm khât, tuăn pơ’lêh nếo; pro pơxúa má môi, tơƀrê má môi. Pôa Rô Ông K’ Thiên, tối:

“Đảng ủy cheăm hiăng tơbleăng tơdroăng pơkâ 34 dêi Khu kăn pơkuâ hnê Đảng kong pơlê troh rêm ngế đảng viên ƀă tơrêm chi ƀô̆ thôn. Ing mê, Chi ƀô̆ thôn hiăng tơbleăng trâu rơdâ  tơdroăng pơkâ mê tung mâu rôh hôp chi ƀô̆, tá a mâu rôh hôp tâi tâng dêi thôn. Ing mê, mâu đảng viên ƀă kuăn pơlê tung thôn xuân vâ pêi pro tro mâu tơdroăng chêh tung hnê mơhno pơkâ ƀă kơhnâ vâ pêi ƀối, tơdroăng rêh ối dêi pơ’lêh, tơdroăng tơrŭm pơla nhŏng o tung mâu pơlê thăm tơrŭm krá tâ’’ .

Cheăm Lát, tơring Lạc Dương ai lối 70% kuăn pơlê cho kuăn ngo, ki hên rêh kâ ối kơnôm to tơdroăng pêi chiâk pêt kơchâi plâi, pôm, kơphế. Mơhé tơdjâk xơpá tơdjuôm dêi tơdroăng cheăng kâ tơnêi têa, la Cheăng kâ - rêh ối pơlê pơla dêi kong pơlê xuân pơtối rak tơniăn mơnhông tơƀrê. Tung mê, pêi lo liăn riên rêm ngế hiăng châ vâ chê 50 rơtuh liăn/hơnăm, tâk 5 rơtuh liăn tâng vâ pơchông ƀă apoăng hơnăm 2024, kơxô̆ rơpŏng kơtiê xuân chu ối 2,6%, tơdroăng mơhnhôk mơjiâng thôn pơlê nếo pro pơxúa tơƀrê ƀă 17/19 pơkâ hiăng pê klêi ƀă hên ki ê.

Tiô pôa Lơ Mu Ha John, Kăn phŏ hnê ngăn Đảng ủy cheăm Lát, tơring Lạc Dương, kong pơlê Lâm Đồng, tơdroăng mê veăng ai hnoăng ki kal dêi tơdroăng tơbleăng pêi teăm tơdrêng tơbleăng troh lâp lu pơkâ 34 trâu rơdâ tung đảng viên ƀă mâu khu râ kuăn pơlê.

“Drêng pơkâ 34 châ tơbleăng plêi trâu rơdâ, hên kăn ƀô̆ đảng viên ƀă kuăn pơlê vâ môi tuăn, pêi pro tro mâu tơdroăng kal pêi, kal ví. Ing mê, kuăn pơlê rế ton rế loi a troăng hơlâ dêi Đảng ƀă Luât tơnêi têa’’.

Tơdrêng ƀă tơdroăng pơkâ 34 Khu kăn pơkuâ hnê ngăn Đảng kong pơlê Lâm Đồng xuân pơtối tơbleăng Mơgêi 21, hâi lơ 25/10/2021 dêi Khu Kăn xiâm Đảng rơtế ƀă mơdêk tơdroăng hriâm, pêi pro tiô tuăn mơno, túa pêi cheăng Hồ Chí Minh ƀă hnoăng cheăng châ tối dêi mâu kăn kăn ƀô̆, đảng viên, ki hdrối cho ngế ki pơkuâ. Ing mê, pro pơhlêh tơdrêng, nhên ‘na ki hlê plĕng ƀă tơdroăng pêi pro dêi rêm râ ủy, mâu kăn, kăn ƀô̆, đảng viên tung tơdroăng pêi pro tro tiô troăng hơlâ dêi Đảng, luât tơnêi têa, pro xiâm ki nếo mơnhông tơdroăng rêh ối dêi mâu pơlê tối krê, cheăng kâ-rêh ối tơdjuôm dêi pơlê cheăm tơring kong pơlê mơnhông  tơƀrê.