Troăng pêi hriăn plĕng, pơkâ rah rak tơniăn mâu kơ koan cheăng ối tung kơvâ Đảng, Chin phuh ƀă Kuô̆k hô̆i hiăng păng ‘nâng châ pôa Lê Minh Hưng, Kăn pơkuâ Khu tơkŭm po tơnêi têa tối a Hneăng hôp hâi lơ 1/12 a ngiâ lối 1,3 rơtuh đảng viên tung lâp tơnêi têa. Pôa Lê Minh Hưng, Kăn pơkuâ tơkŭm po tơdroăng tơnêi têa hiăng tối mâu troăng pêi ki nhên vâ rah pro tơniăn, lĕm tro mâu kơ koan Đảng, Chin phuh, Kuô̆k hô̆i, Măt trâ̆n Tơnêi têa, mâu khu tơrŭm cheăng kal kí - rêh ối pơlê pơla ƀă mâu khu pơkuâ kuăn pơlê xua Đảng, Tơnêi têa pơcháu hnoăng cheăng... tiô troăng môi kơ koan pêi pro hên tơdroăng cheăng, môi tơdroăng cheăng bu pơcháu ăm môi kơ koan pơkuâ ƀă pôu râng hnoăng cheăng xiâm, tah lôi tâi tâng tơdroăng ki bô bối ‘na tơdroăng cheăng, hnoăng cheăng, tơklâ ‘na tơnêi tơníu, kơvâ cheăng.

Mâu kơ koan, khu tơrŭm cheăng hdrối nah hiăng rah tơtro apoăng xuân môi tiah thế séa ngăn vêh pơkâ, khŏm xut tah lôi khu ki ối tung dế. Tiô troăng rah pro tơtro, tơ’mot chiâng môi châ Kăn pơkuâ tơkŭm po tơdroăng cheăng tơnêi têa tối ki vâ iâ kơdroh 4 kơ koan Đảng ối tung Tơnêi têa, kơdroh 5 khu xiâm, 2 kơ koan ối tung Chin phuh, kơdroh 4 Vi ƀan dêi Kuô̆k hô̆i ƀă 1 kơ koan ối tung Vi ƀan pơkuâ Kuô̆k hô̆i...

‘Na tơdroăng cheăng kâ, rêh ối pơlê pơla, pôa Phạm Minh Chính, Ngế pro xiâm hnê ngăn tơnêi têa tối ăm ‘nâi tơdroăng cheăng kâ – rêh ối pơlê pơla 11 khế hiăng hluâ châ hên tơƀrê kal khât, lĕm tro tâ tâng pơchông ƀă hneăng hdrối tung tâi tâng mâu kơvâ. Tiô tối hdrối tâi tâng 15 túa pơkâ ki xiâm châ ƀă hluâ pơkâ pêi. Tơtêk plâ hơnăm tiô tối hdrối châ lối 7%. Chin phuh mơnhên hơnăm 2025 cho hơnăm tơtêk rĕng kêi đeăng, mơ-eăm châ tơƀrê hên má môi mâu pơkâ, pơkâ pêi dêi pơkâ pêi 5 hơnăm 2021 – 2025.

Xông tơpui hnê mơhno a hneăng hôp pôa Tô Lâm, Kăn xiâm pơkuâ hnê ngăn Đảng tối, vâ châ pơkâ mơnhông cheăng kâ - rêh ối pơlê pơla ki Pơkâ Hneăng hôp má XIII hiăng pơkâ, pin thế pơhlêh tơmiât, thế rĕng pêi pro, châ tơƀrê, tơkâ hluâ dêi tơná; pơkâ, mâu râ, mâu kơvâ cheăng ing Tơnêi têa troh râ cheăm pơlê thế mơnhên khŏm mơ-eăm kal kí tung pêi pro troăng hơlâ kố; kăn ƀô̆ pơkuâ, ngế ối a ko, kơ koan kal djâ troăng ahdrối, hbrâ, kơtăng tung pêi pro hnoăng cheăng châ pơcháu.

Kal pơtối mơnhông tâ mê nếo ‘na pơkâ pêi, tah lôi mâu tơdroăng pá puât, tơvâ tơvân, tíu ki kreăng vâ pro tơ’lêi hlâu tŭm tơdroăng cheăng ƀă pro pơhlêh tung pro mơ-éa ó rơdêi, tơmiât pêi rơkê tíu pêi cheăng tơ’lêi hlâu vâ mơnhông mơdêk.