Cheăm Dưng K’Nơ̆, tơring Lạc Dương, kong pơlê Lâm Đồng ai lối 90% kuăn pơlê hdroâng kuăn ngo. Tơdrêng ƀă pâ thế Tơnêi têa thâ pro klêi troăng Trường Sơn Đông, troăng kân 722 ki tơkâ luâ cheăm vâ mơdêk tơdjêp troh prôk vâ tơ’lêi prôk lăm cheăng kâ tê mơdró, ‘no liăn pro tơmeăm khoăng, malối troăng kơxái on tơhrik 3 pha vâ tơniăn tung pêi chiâk ƀă tơdroăng rêh ối, mơnhông cheăng kâ - rêh ối mơnhông tơƀrê.

Kuăn pơlê tíu kố tơmâng khât troh tơdroăng rak ngăn kong ƀă mâu luât pơkâ tŏng kum tơdrêng ing kong vâ mơdêk pê lo liăn, tơniăn ăm kuăn pơlê tung rêh ối. Tơbleăng a rôh reâm mâ, pôa Phan Đình Trạc Ngế xiâm tí tăng ‘nâi plĕng mâu tơdroăng ăm tíu xiâm tơnêi têa tối tiah kố mâu tơdroăng tối pâ thế dêi kuăn pơlê mê tro tơxâng ‘nâng.

Khu kăn Kuô̆k hô̆i kong pơlê Lâm Đồng kố pâ thế mâu kơ koan tíu pêi cheăng ai tơdjâk troh séa ngăn, tơleăng mơnhên, hlối tăng ‘nâi plĕng tơ’nôm mâu tơdroăng vâ pro tơniăn tung cheăng kâ krá tơniăn ăm kuăn pơlê ki rêh ối kơnôm to a kong.

Rôh kố, khu kăn Kuô̆k hô̆i kong pơlê Lâm Đồng hiăng diâp ăm 20 kơxu tơmeăm ăm mâu rơpŏng kuăn pơlê ki ai hnoăng tơnêi têa, rơpŏng kơtiê, xơpá.