Hneăng má I/2026, rêm râ Đảng a kong pơlê Dak Lak hiăng tơbleăng pêi tơdâng tơ’mô hnoăng cheăng mơnhông cheăng kâ rêh ối pơlê pơla, rak vế pơlê pơla cheăm bêng, gâk kring, mơjiâng khu cheăng kal kí. Khu pơkuâ ngăn Đảng hiăng pơkâ pêi pro mâu tơdroăng pơkâ dêi Tơnêi têa ƀă tơdroăng pơkâ pêi thăm mơnhông pơla hơnăm 2026 – 2030, pro tíu vâ mâu tíu pêi cheăng pơhlêh ƀă túa pơkâ, tơdroăng tơkêa tro ƀă tơdroăng ki ai khât.

Cheăng mơjiâng Đảng, tơrŭm kăn ƀô̆, séa ngăn, mơhnhôk, pơhlêh chêh pro hlá mơ-éa châ pêi pro tơdâng tơ’mô; cheăng Măt trâ̆n hlo mơnhông ƀă rak ngăn tŏng gum kế tơmeăm Têt ƀă hbrâ rơnáu rôh tâ phĭu.

Mơgêi rôh hôp, jâ Cao Thị Hòa An, Phŏ kăn pơkuâ hnê ngăn Đảng Dak Lak pơkâ thế rêm râ Đảng rĕng pêi pro tơkŭm klêi kơ’nâi rôh tâ phĭu, pôi tá pro tơdroăng cheăng tro pơtê; tơkŭm tâi ivá ăm thăm mơnhông, xo tơdroăng ki pêi pro tơƀrê pro kế ki  mơnhên tối kăn ƀô̆. Rơtế amê, mơdêk rĕng ‘no liăn pêi cheăng tơdjuôm, lêi tah tơdroăng ki xơpá, pơtê tơdroăng tơkêa bro hrá; pêi pro kơtăng tro luât, mơdêk tơƀrê kơ koan cheăng tơnêi têa, mơdêk pơhlêh cheh pro mơ-éa, pơhlêh kơxô̆; rak vế tơniăn sap ing cheăm bêng.

Malối, kong pơlê Dak Lak pơkâ thế tơkŭm pêi pro pơhlêh ƀă tơbleăng kơtăng 9 tơdroăng pơkâ pêi tung la ngiâ dêi Khu xiâm cheăng kal kí, pro ivá ăm mơnhông rĕng, krá tơniăn tung hneăng ki nếo.