VOV4.Xơ Đăng - Ƀă pơkâ xiâm ôh tá ăm ai mâu roh hơ-ou kế kâ ƀă mâu pơreăng tâ tú ing kế kâ, tung roh Têt Trung thu hơnăm 2022, kong pơlê Dak Lak hiăng pêi pro pơkâ séa ngăn mâu tíu mơjiâng pro kế kâ, tê mơdró kơƀăn trung thu tung kong pơlê. Pơtối mê, sap hâi lơ 6 troh lơ 8 khế 9, kong pơlê Dak Lak kô mơjiâng péa khu séa ngăn a 6 tơring, pơlê kong krâm ƀă pơlê kong kơdrâm séa ngăn tơdroăng pêi pro mâu pơkâ luât ‘na rak tơniăn kế kâ dêi mâu khu ki mơjiâng pro, tê mơdró tung kong pơlê.

Dak Lak: Tơniăn krúa lĕm kế kâ roh Têt Trung thu hơnăm 2022

Khu râ kăn séa ngăn kô tơkŭm a mâu tơmeăm kâ châ xúa hên tung roh Têt Trung thu, môi tiah: Kơƀăn, mư̆t, kĕo, drôu, ƀiêr, hơ’nêh, tơmeăm ing hơ’nêh. Rơtế ƀă tơdroăng séa ngăn, Khu râ kăn kô tơrŭm ƀă mâu tíu cheăng pơtâng tối vâ thăm pơtâng tối mâu pơkâ ‘na rak tơniăn krúa lĕm kế kâ troh mâu tíu mơjiâng pro, tê mơdró kế kâ ƀă hnê mơhno kuăn pơlê troăng rah xo, xúa mâu tơmeăm tơniăn tung roh Têt Trung thu.

A Sa Ly tơplôu ƀă tơbleăng