VOV4.Xơ Đăng - Tung khế 6 ƀă khế 7 pơla hdrối kố nah, Kŏng ti ngăn on tơhrik Dak Lak hiăng tơkŭm pêi ƀlêi chiâng ‘na tơdroăng hnê tối xúa on tơhrik tơniăn ăm mâu rơpŏng hngêi dêi kăn ƀô̆, mơngế pêi cheăng a 16 tíu ngăn on tơhrik ƀă khu ki pêi cheăng. Tơdroăng cheăng kố cho vâ hnê tối rơdâ ƀă thăm mơdêk ki hlê plĕng vâ tơniăn tung xúa on tơhrik drêng pêi cheăng.

Kố cho roh apoăng Dak Lak tơkŭm po tơdroăng pơtâng tối tơniăn on tơhrik troh nhŏng o dêi kăn ƀô̆ kŏng nhân viên, mơngế pêi cheăng tung tâi tâng kong pơlê. Pơtối mê, rơtế ƀă mơđah tơbleăng mâu tơdroăng ki ai khât tung tơdroăng chêh vêh hơ’muăn mâu tơdroăng ki ai khât ‘’SOS – Tơniăn vâ vêh a hngêi’’, mâu um pơtâng tối xo tơmeăm pro mơhno a ngiâ a kong pơlê, khu râ kăn pơkuâ Kŏng ti on tơhrik Dak Lak xuân tơpui tơno, tơmâng ƀă tiâ mâu tơdroăng rơhêng vâ ‘nâi plĕng ƀă nhŏng o dêi mâu kăn ƀô̆, kŏng nhân viên .

Tơdroăng hiăng châ tơdah tơdroăng ki môi tuăn păng ‘nâng, kum troh lâp lu ƀă mơdêk hlê plĕng ‘na rak tơniăn pêi cheăng ƀă mâu rơpŏng. Nâ Trần Thị Hiền, kơdrâi ngoh Nguyễn Xuân Bắc, kŏng nhân On tơhrik Dak Lak, tối ăm ‘nâi:

‘’Ing tơdroăng pơtâng tối hâi kố kum ăm á hlê plĕng tâ ‘na tơdroăng cheăng dêi kơnốu. Mê rơpŏng kô chiâng tŏng kum ăm kơnốu ‘na tơdroăng cheăng tuăn tơmiât, mơhnhôk hiâm mơno ăm kơnốu á lăm pêi cheăng ôh tá ai tơmiât klâi, vâ kơnốu tơkŭm tung pêi tơdroăng cheăng tơniăn tâ’’.

Môi roh pơtâng tối ăm mâu ngế nhŏng o tung kơvâ on tơhrik

Ƀă nâ Lê Thị Mỹ Hạnh, kơdrâi ngoh Đàm Thanh Cao, kŏng nhân pêi cheăng On tơhrik Nam Buôn Ma Thuột, tối:

‘’Á ‘nâi tơdroăng pêi cheăng ki nhŏng o á dế pêi, ki rơhêng vâ tối cho tơdroăng cheăng tơniăn tung kơvâ on tơhrik thế tơniăn mâu pơkâ pêi môi tiah lâi. Mê á hlê plĕng vâ tŏng kum ăm dêi kơnốu, mê á ối chiâng vâ pơtâng tối ăm mâu ngế nhŏng o ki ê xuân hlê plĕng tơdroăng ki mê’’.

Pôa Trần Tấn Phùng, Kăn hnê ngăn Kŏng đoân, Phŏ pơkuâ Kŏng ti on tơhrik Dak Lak, tối ăm ‘nâi, ing tơdroăng kố, kŏng ti pói vâ rêm ngế nhŏng o dêi kŏng nhân kơvâ on tơhrik xuân chiâng mâu ngế pơtâng tối ki kơhnâ má môi, pơchân tối rêm hâi ‘na mâu tơdroăng ki rơ-iô tung tơdroăng pêi cheăng.

Tơdrêng amê, Kŏng ti xuân pơkâ thế mâu tíu cheăng mơjiâng mâu khu ngế tung Zalo ƀă tơdroăng ki veăng dêi nhŏng o vâ rêm ngế kô veăng tơpui khĕn tung tơdroăng pêi cheăng, tơpui pâ thế ƀă rơtế veăng tung tơdroăng mơdêk tơniăn pêi cheăng.

‘’Tơdroăng ki phá tơ-ê dêi kơvâ on tơhrik cho tâng ai tơdroăng ki tơ’nhê on tơhrik mê thế pêi tá kơmăng, mê xuân pói vâ mơngế nhŏng o ‘nâi, veăng hơlêm. Má péa nếo, rak tơniăn tung tơdroăng cheăng kơvâ on tơhrik mê kô hên tơdroăng, tung mê ai tá tơdroăng tơmiât tô tuăn tung pêi cheăng ai tơdjâk. Mê kŏng ti xuân vâ pơtâng ối troh mơngế nhŏng o veăng hơlêm mâu tơdroăng tung hnoăng cheăng vâ mơngế pêi cheăng ôh tá tô tuăn drêng ối a tíu pêi cheăng mê tơdroăng cheăng kô châ tơniăn tâ’’.

Kŏng nhân kơvâ on tơhrik đi đo trâm mâ ƀă tơdroăng rơ-iô drêng pêi cheăng

Châ ‘nâi klêi kơ’nâi tơdroăng pêi cheăng kố, PC Dak Lak kô mơnhên, xo vêh túa ki rơkê vâ mơjiâng tơdroăng cheăng achê, hên tơdroăng tâ ăm mâu roh pơtâng tối pơtối tiô pơkâ xiâm má mơ’nui cho tơniăn păng ‘nâng ƀă mơngế pêi cheăng.

A Sa Ly tơplôu ƀă tơbleăng