VOV4.Xơ Đăng - Sap apoăng hơnăm troh nôkố, tơdroăng rak tơniăn rơxế kơtâu ƀă troăng klông a Dak Lak kơdroh a 3 túa, cho kơxô̆ roh tơklâm ki râ, kơxô̆ mơngế hlâ ƀă tro rong. Ki nhên, tung lối 8 khế hiăng hluâ tung kong pơlê Dak Lak ai 151 roh tơklâm rơxế râ ó, pro hlâ 112 ngế, tro rong 76 ngế. Tâng pơchông ƀă roh kố hơnăm nah kơdroh 9 roh, 11 ngế hlâ ƀă 35 ngế tro rong. Kơvâ cheăng kong pơlê kố dế thăm mơdêk mâu troăng vâ rak tơdroăng châ tơƀrê, ki rơhêng vâ tối cho roh hdrối, tung ƀă kơ’nâi roh Leh Hâi mơjiâng tơnêi têa lơ 2/9.

Tơdroăng rak tơniăn troăng klông a Dak Lak tung lối 8 khế hơnăm 2022 kơdroh tơdâng tŭm 3 túa

Pôa Bùi Văn Ngọc – Kăn pơkuâ Ƀơrô Khu rak tơniăn troăng klông ƀă rơxế kơtâu Dak Lak tối ăm ‘nâi, Khu rak tơniăn troăng klông ƀă rơxế kơtâu Dak Lak hiăng tơbleăng ăm Vi ƀan kong pơlê hnê mơhno mâu khu cheăng môi tiah: Ngế séa ngăn troăng klông, Kan sát rak tơniăn troăng klông, Kan sát rak tơniăn pơlê pơla ƀă hía hé, thăm séa ngăn, mơdât, pơxâu phâk mâu tơdroăng pro xôi to rơxế drô troăng klông; thăm pơtâng tối troh mâu râ kuăn pơlê, ki má lối cho tung mâu hngêi trung hriâm vâ kuăn pơlê pêi kơtăng luât rak tơniăn troăng klông ƀă rơxế kơtâu.

A Sa Ly tơplôu ƀă tơbleăng