Vêh dêi a pơlê cho ƀuôn Sut Mđưng, cheăm Čư Suê, tơring Čư Mgar klêi  ai pơreăng tâ tú rôh má 4 a mâu kong pơlê peăng Hdroh tơnêi têa, ngoh Y Uel Niê hiăng mơ-eăm lăm tăng cheăng pêi vâ ai liăn kâ tơniăn tung rêh ối. Apoăng ngoh lăm po nhâ vâi a chiâk, lăm xui kơxâk, veăng pro hngêi vâi... péa khế kố, ngoh hiăng châ tăng cheăng pêi tơniăn cho tê tơmeăm ăm tíu  tê reăng, tê loăng mơnâ mâ, ƀă kơxô̆ liăn kâ 300 rơpâu liăn/hâi.

Ngoh Y Uel ăm ‘nâi, mơhé pêi tơdroăng cheăng klâi ngoh xuân mơ-eăm tâi ivá tơná vâ tơdroăng cheăng pêi châ tơƀrê má môi, ing mê vâ ai hên iâ liăn pê lo ăm tơná:

“Á hlo tơdroăng cheăng mê tơtro ƀă á, á kô mơ-eăm pêi vâ tăng tơ’nôm kơxô̆ liăn ăm dêi rơpŏng hngêi á’’.

Hlo pơxúa ing tơdroăng păn kơpôu pá kơdâm kong, rơpŏng hngêi Y Bông Lào, ối a tơring Ea Súp tơdrêng ƀă 25 rơpŏng hngêi ki ê  hiăng tơrŭm ƀă dêi rơpó a cheăm Čư Mlan păn kơpôu tâk troh 500 to. Ngoh Y Bông Lào ăm ‘nâi, hdrối nah ngoh păn kơpôu tiô túa kơ’nêi ăm rêi nhâ pá kong rơtế ƀă mâu ro  mê hlối mơdoh hnoăng lăm kơ’nêi la kơxô̆ liăn pêi lo ôh tá hên, kơ’nâi tí tăng hriâm, tăng ‘nâi plĕng ‘na tơdroăng păn kơ’nêi kơpôu pá kơdâm kong ƀă châ mâu kăn cheăm tơbleăng pêi túa păn ki mê, rơpŏng hngêi ngoh hiăng chêh inâi vâ păn. 

Klêi kơ’nâi to lâi khế hơnăm păn, ngoh Y Bông Lào hlo dêi tơƀrê khât:

“Rơpŏng hngêi păn 20 -30 to kơpôu, mê xuân hlo ai pơxúa tung cheăng kâ, môi hơnăm châ xo dêi liăn rơkâ 20 troh 30 rơtuh liăn, tối tơdjuôm xuân hôm, châ xo tơ’mot liăn xuân hên há.

Mơhé hiăng vâ chê 70 hơnăm la pôa Tạ Hữu Ôn ối a Buôn Ky, bêng Thành Nhất xuân dế kơhnâ pêi cheăng, tăng troăng ki  nếo tung mơnhông  cheăng kâ. Hdrối nah lối 7 sào  tơnêi dêi rơpŏng hngêi, ki hên pôa Ôn pêt kơphế tơvât ƀă tiu la xua yă tiu đi đo chu rơpâ, tiu hlối hlâ xua tro pơreăng mê chiâng lŭp hên.  

Ôh tá hêng hmếo pôu pá tiah mê, pôa Ôn hiăng mơ-eăm hriâm, khên pơ’lêh pêt hdrê krui ƀŏng kơtôu ngiât, tơkŭm ƀă mâu plâi kâ ki ê môi tiah plâi treăng xâk, krui kuât... troh nôkố, túa pêi cheăng mê rế mơnhông po rơdâ ƀă châ xo lối 100 rơtuh liăn/hơnăm.

“A xuân tơmiat á mơ-eăm, thế mơ-eăm ing ivá tơná, á hlo po rơdâ kơdrum dêi tơná, pêt tơ’nôm krui ƀŏng kơtôu ngiât ƀă pêt tơ’nôm mâu loăng plâi ki ê nếo vâ tơ ƀrê’’.

Kơ’nâi 3 hơnăm  pro kŏng nhân dêi Tôh Cơ điện Kŏng ti Veăng tơlo liăn pro meăm Thĕp ASEAN, tung kơpong hngêi kơmăi Hòa Phú ngoh Y Huynh Kƀuôr, ƀuôn Drai H’Ning, cheăm Hòa Xuân, pơlê kong kơdrâm Buôn Ma Thuột nôkố hiăng chiâng ngế pêi cheăng ƀă kơxô̆ liăn pêi lo lối 10 rơtuh liăn/khế.

Ngoh Y Huynh Kƀuôr ăm ‘nâi, hdrối vâ mot pro kŏng nhân tung Kŏng ti, ngoh hiăng pêi cheăng ‘mâi rơnêu, ‘mêng rơxế hon đa. Kơnôm hiăng hmâ pêi cheăng ‘mâi rơnêu, mê drêng mot cheăng a Kŏng ti ngoh kô rĕng chiâng pêi tâ mâu tơdroăng cheăng. Tơdroăng cheăng tơtro, hlối mơhá liăn hôm há kum ăm ngoh Y Huynh Kƀuôr ai tuăn vâ mơ-eăm tâ nếo:

“Tung pơla pêi cheăng ôh tá ai tơdroăng tô tuăn, hâi pêi cheăng a kŏng ti ƀă tơdroăng tŏng kum dêi kŏng ti hôm ‘nâng, kơlo liăn kâ tơniăn, bê vâ xúa tung rêh ối dêi rơpŏng hngêi á. Á vâ pêi cheăng ton hơnăm a kŏng ti ƀă vâ ‘no hnoăng cheăm ăm kŏng ti hên  tâ , vâ kŏng ti rế mơnhông tâ nếo”.

Mơhé tơdroăng cheăng pơrá phá dêi pó, la vâi xuân ai tơdjuôm môi tơdroăng kơhnâ, ‘nâi hriăn plĕng tung pêi cheăng. Ƀă vâi, hơniâp ro ôh tá xê mâu tơdroăng ro rih, hơniâp ro cho pêi cheăng ki tơná vâ ing mâu tơdroăng cheăng ki mê kô pro pơxúa ăm vâi châ xo tơ’mot liăn tơniăn tung rêh kâ ối.