VOV4.Xơ Đăng - Rơtế ƀă hok tro tung lâp kong pơlê Dak Lak, hâi lơ 29/8 hâi kố, ai lối 15 rơpâu 200 ngế hok tro a tơring tơkăng kong Ƀuôn Đôn kô pơxiâm mot hơnăm hriâm nếo cho hơnăm hriâm 2022-2023. A hâi ki kố, mâu hngêi trung dế kơhnâ khât tung tơdroăng hbrâ rơnáu dêi mâu kơƀăng tăng, hngêi trăng, kế tơmeăm, khu thái cô, hbrâ rơnáu, mơjiâng pro tơdroăng ki phiu ro vâ rơnáu koh tơdah mot hơnăm hriâm nếo.

Hơbnăm hriâm kố, Hngêi trung Mâm non Họa Mi, cheăm Krông Na, tơring Ƀuôn Đôn ai 12 to lâm, tâi tâng ai 360 ngế muăn hriâm a môi to hngêi trung xiâm ƀă 2 to hngêi trung kơtăn hơngế iâ ing mê. Mâu hâi ki kố, mâu cô hnê dêi mâu hngêi trung dế  pêi cheăng kơhnâ khât, kơpuih văng, pro krúa lĕm, rơnuâ tâ tá hngêi trung, lâm hriâm, pêt mơjiâng xiâm loăng, po văng nhâ, rak vế ki lĕm ngiât dêi reăng loăng, rơnêu mâu plông ăm i krúa, lĕm ro vâ hbrâ koh tơdah vâi o mot hơnăm hriâm nếo.

Cô Lê Thị Phúc, Kăn phŏ pơkuâ hnê ngăn Hngêi trung tối ăm ‘nâi:

“Hngêi trung hiăng tơkŭm mâu thái cô, kăn ƀô̆ lo po văng nhâ, kơpuih krúa mâu lâm, tung kơdrum, plông tung hngêi trung i lĕm. ‘Na kơƀăng tăng, tơmeăm hnê hriâm hngêi trung hiăng tối tơbleăng ăm mâu khu râ kăn pơkuâ cheăm, tơring veăng kum. Tâi tâng mâu thái cô hiăng châ xing xoăng pơkuâ lâm, mâu vâi cô hiăng troh mot tung lâm vâ ‘mâi rơnuâ mâu tơmeăm khoăng tung lâm vâ hâi lơ 29/8 kố tơdah mâu vâu muăn tơŭm a hngêi trung”.

Cô hnê mâm non xut mơgrúa tơmeăm xah hêi ăm hok tro hdrối vâ mot hơnăm hriâm nếo

Pakĭng mâu tơdroăng ki hbrâ rơnáu mâu kơƀăng tăng, kế tơmeăm, pro mơgrúa tơmeăm khoăng tung lâm, tung hngêi trung mê mâu hngêi trung ối tŏng kum, ngăn khât tơdroăng ki pơtối ăm mâu thái cô lo lăm hriâm. Xua tơring Ƀuôn Đôn ti xê to pá puât to troăng prôk, xua tíu ối achê tơkăng kong, mê ối châ tơdế tâi tâng hok tro dêi tơring cho mâu hok tro hdroâng kuăn ngo. Xua ai hên vâi o vâi muăn cho hok tro kuăn ngo, tơdroăng nâl tơpui kal athế pơtối ăm thế mâu thái cô hriâm nâl kuăn ngo, athế kơdo mơ-eăm, ai tuăn kâi xân, rơkê plĕng tung tơdroăng hnê hriâm, malối ƀă tơdroăng ki hnê mơhno mâu vâi o ‘na tơdroăng hnê chư tiô mâu kơxop hlá mơ-eá dêi lâm 1, lâm 2 ƀă lâm 3.

Pôa Hồ Sĩ Lâm, Kăn pơkuâ hngêi trung râ má môi Y Jút, cheăm Krông Na, tơring Ƀuôn Đôn tíu ki ai troh 80% hok tro cho kuăn ‘nĕng hdroâng  kuăn ngo, ai tối:

“Mot hơnăm hriâm nếo, hngêi trung hiăng hriăn plĕng ngăn tơdroăng, ki rơhêng vâ tối ƀă khu lâm 1, lâm 2, hngêi trung hiăng xing xoăng ăm mâu thái cô hlê plĕng nâl kuăn ngo vâ hnê mâu lâm ki mê, malối  cho lâm 1. Tung pơla hok tro lăm troh a hngêi trung tá hâi teăm ‘nâi plĕng trâu rơdâ, hlê hơngế ‘na nâl Xuăn, mê ngăn tiô kơ hok tro ki mê cho hdroâng kuăn ngo ki lâi mâu thái cô athế hriâm nâl kuăn ngo ki mê, ƀă athế tơpui nhên, tơpui leăng vâ ăm vâi o hok tro rĕng hlê plĕng tâ”.

Tiô pôa Đỗ Nọc Anh, Kăn pơkuâ ƀơrô hnê hriâm ƀă hnê mơjiâng tuăn ngôa rơkê dêi tơring Ƀuôn Đôn tối ăm ‘nâi, tá troh a chôu phut kố, mâu hngêi trung  hiăng hbrâ tŭm mâu kơƀăng tăng, tơmeăm hnê hriâm, khu thái cô tŭm têk. Lâp tơring dế nôkố ai 34 toăng hngêi trung, ing râ mâm non troh a râ má 3 ƀă yăo yuk thưong xuên. Hơnăm hriâm 2022-2023, mâu hngêi trung ai lối 15 rơpâu 200 ngế hok tro, ai tơdế kơxô̆ hok tro cho kuăn ‘nĕng dêi mâu hdroâng kuăn ngo. Tung mê, ki hên cho mâu hdroâng kuăn ngo M’nông, Rơđế, Jarai, ƀă hên mâu hdroâng kuăn ngo ki ê, tơdroăng rêh ối  trâm hên xahpá. Xua mê, vâ kum ăm mâu vâi o, vâi o troh hriâm tŭm a hngêi trung, Ƀơrô ngăn ‘na hnê hriâm ƀă hnê mơjiâng tuăn ngôa rơkê hiăng hnê mâu hngêi trung kal athế tí tăng hlê plĕng, mơhnhôk, veăng kum mâu vâi o, ôh tá lôi ăm vâi o ki lâi xua ing tơdroăng xahpá mê khoh lôi pơtê hriâm.

Pôa Đỗ Ngọc Anh tối ăm ‘nâi:

“Ƀơrô hnê hriâm hiăng hnê thế mâu hngêi trung kal athế mơjiâng troăng hơlâ tơrŭm ƀă tơring, cheăm ƀă khu kăn, mâu thôn, pơlê vâ lăm troh a tơrêm hngêi trăng dêi nôu pâ hok tro, chu troh a tơrêm rơpŏng hngêi vâ hnê mơhnhôk mâu vâi o vêh hriâm a hngêi trung, a lâm tơniăn”.

Thái cô hnê râ má môi Y Jut, tơring Ƀuôn Đôn kơpuih văng, xut lâm hriâm vâ koh tơdah hok tro tung hơnăm hriâm nếo

Maluâ ối trâm hên xahpá, la ƀă tơdroăng ki hbrâ rơnáu hdrối, lối châ rơpâu ngế hok tro ƀă mâu thái cô a tơring tơkăng kong Ƀuôn Đôn, kong pơlê Dak Lak hiăng hbrâ rơnáu ăm hơnăm hriâm nếo ƀă tơdroăng ki tơniăn lĕm má môi.

Hương Lý chêh

Nhat Lisa tơplôu ƀă tơbleăng