Viƀan hnê ngăn kong pơlê Dak Lak xuân nếo po Rôh hôp mơnhên tối klêi kơ’nâi pêi pro mâu tơdroăng pơkâ tơnêi têa 6 khế apoăng hơnăm ƀă hnoăng cheăng ki kal 6 khế mơ’nui hơnăm hơnăm 2023; mơnhên tối tơdroăng tối tơbleăng pêi pro mâu tơdroăng pơkâ tơnêi têa pơla hơnăm 2021 – 2023, troăng hơlâ, hnoăng cheăng ki kal pơla hơnăm 2023 – 2025 ƀă pơkâ tơbleăng tung pơla hơnăm 2026 - 2030.

Tiô kơxô̆ tối tơbleăng a Rôh hôp, pêi pro 3 tơdroăng pơkâ tơnêi têa, Dak Lak hiăng châ pơcháu 2.319 rơtal liăn, châ 50,91% tung tai tâng kơxô̆ liăn pơla hơnăm 2021 – 2025. Mâu tơdroăng pơkâ tơnêi têa hiăng veăng kum mơdêk rĕng tơdroăng ki mơjiâng thôn pơlê nếo ƀă kơdroh kơtiê a Dak Lak. Kơxô̆ rơpŏng kơtiê tung lâp kong pơlê kơdroh 1,5 – 2% tung môi hơnăm; rơpŏng kơtiê tung kơpong hdroâng kuăn ngo kơdroh 3 – 4% tung môi hơnăm.

Xuân tiô mơnhên tối a rôh hôp, tơdroăng ki pêi pro 3 tơdroăng pơkâ tơnêi têa a Dak Lak ối ai hên xơpá. Tung la ngiâ ah, kong pơlê kô mơ-eăm tŏng kum mâu tơdroăng ki xơpá, vâ mâu tơdroăng mơnhông tơƀrê má môi. Tung mê, tơdroăng ‘na tơnêi ối, tơnêi pêi chiâk tung kơpong hdroâng kuăn ngo kô châ kơjo má môi, rak vế ăm vâi krâ nhŏng o hdroâng kuăn ngo a kong pơlê.