VOV4. Xơ Đăng - Kơxo lơ 24/8, a pơlê kong kơdrâm Ƀuôn Ma Thuột, Khu ngăn ‘na tơdroăng ki tơrŭm tơroâ Việt Nam – Lếo kong pơlê Dak Lak tơkŭm trâm mâ mâu kăn cho khu lêng hneăng hdrối, mâu ngế ki rơkê plĕng ki hdrối nah hiăng pêi cheăng a Lếo drêng tơbâ 60 hơnăm hâi mơjiâng tơrŭm cheăng tơpui kâ (5/9/1962-5/9/2022) ƀă 45 hơnăm hâi kĭ tơkêa tơrŭm tơroâ, tơrŭm pơla Việt Nam – Lếo, Lếo – Việt Nam.

Tâ tá rôh trâm mâ

A rôh trâm mâ, mâu kăn hiăng châ hmâng tâi hlá mơ-éa pơchuât dêi pôa Nguyễn Phú Trọng, kăn xiâm pơkuâ hnê ngăn cheăng Đảng a Leh tơbâ 60 hơnăm Hâi mơjiâng tơrŭm cheăng tơpui kâ Việt Nam – Lếo. Trâm mâ, tối mâu tơdroăng tơbâ tung pơla veăng pêi hnoăng cheăng, tơplâ a tơnêi têa Lếo, tối ‘na tơdroăng ki rơhêng vâ ƀă pơkâ mơ’no, pâ thế mâu tơdroăng ki kal tơdjâk troh hnoăng cheăng dêi Khu ngăn ‘na tơdroăng tơrŭm tơroâ xuân môi tiah tơdroăng ki tŏng kum, tơdroăng cheăng dêi mâu hô̆i viên ƀă mâu khu lêng hneăng hdrối, khu ki rơkê plĕng ki hiăng pêi cheăng, tơplâ a Lếo.

Drêng kố, Vi ƀan hnê ngăn kong pơlê Dak Lak diâp 100 hnoăng tơmeăm ăm mâu khu lêng hneăng hdrối, mâu khu ki rơkê plĕng ki hiăng pêi cheăng a Lếo ai tơdroăng rêh ối xơpá, ôh tá ngế păn roăng.

Katariana Nga tơplôu ƀă tơbleăng