VOV4.Xơ Đăng - Mâu khu ki mơjiâng pro hngêi trăng hiăng mung lối 2 rơpâu rơtal liăn mơ’no vâ mơjiâng tơmeăm tơdjoâm dêi kong pơlê Dak Lak la hên mâu tơmeăm khoăng châ pêi pro chiâng hrá, pro tơdroăng ki mung pơtân mê chiâng tâk troh vâ chê 1 rơpâu rơtal liăn. Vêh tô chĕn, Dak Lak kô ai tơ’lêi tơdroăng ki vâ châ ăm mung a mâu tơdroăng tơkêa pro ki lĕm tro tâ. Maluâ ti mê, kố cho roh ki pá xua hên khu mơdró kâ dế trâm tơdroăng ki pá tung pêi cheăng kâ, tê mơdró, kơxô̆ liăn ki ăm mung pơtân chiâng chĕn ki pá vâ tô tơvêh.

Ki ê nếo, Vi ƀan hnê ngăn kong pơlê xuân tô tuăn tiah kố, tâng mơdrếo tơvêh liăn, ăm phep tơdroăng mơjiâng pro kế tơmeăm chiâng krá, mê kô tro tơnêi têa tah lôi kơxô̆ liăn ki mơ’no kum mê.

Tơdroăng tơkêa bro mơ’no liăn cheăng mơjiâng troăng kân Hồ Chí Minh tíu ki tơkâ luâ peăng Mâ hâi lo pơlê kong kơdrâm Ƀuôn Ma Thuột, kong pơlê Dak Lak pơla hneăng hơnăm 2020-2023 tâi tâng ai liăn ki mơ’no pro châ 1 rơpâu 509 rơtal liăn, troh nôkố hiăng ăm kơxô̆ liăn bu ai 1 rơpâu 44 rơtal liăn. Maluâ ti mê, tơdroăng pêi tơkêa bro mê pêi lối hrá tâng vâ pơchông ngăn ƀă tơdroăng ki pêi mơjiâng bú châ dâng 8%, tơ’mô ƀă ki kơnâ dêi hnoăng mơjiâng pro dâng 80 rơtal liăn.

Tung pơla mê, kơxô̆ liăn ki mung pơtân hdrối dêi mâu khu ki xo mơjiâng pro mê hiăng tâk lối 220 rơtal liăn.

Pôa Phan Xuân Bách, Kăn phŏ ngăn ‘na Khu hnê mơhno tơdroăng tơkêa bro mơ’no liăn mơjiâng troăng prôk ƀă pêi chiâk deăng, mơnhông thôn pơlê kong pơlê Dak Lak, cho khu xiâm dêi tơdroăng tơkêa bro, tối ăm ‘nâi, ai mâu khu ki tơdah xo mơjiâng pro mê mung pơtân la ôh tá vâ pêi pro, mê liăn ki mung pơtân mê chiâng “liăn ki pá vâ châ tô tơvêh”.

Vâ tối, mê cho tơdroăng ki hlo ai a Kŏng ti pêi cheăng tiô rơnó Phương Đông (kơxô̆ 47 troăng Thái Phiên, pơlê kong kơdrâm Ƀuôn Ma Thuột) - cho khu ki tơdah xo mơjiâng pro pá rŏng dêi khu ki mơjiâng tơmeăm kơxô̆ 03, ối tung Tơdroăng tơkêa bro hiăng mung pơtân lối 44 rơtal liăn ƀă châ môi hngêi rak liăn tŏng kum, ôh tá pá ki klâi. Maluâ ti mê, kŏng ti kố hiăng ai tơdroăng ki pêi pro ôh tá tơtro ƀă hiăng pơ’lêh ngế ki ê vâ teăng mâ tơpui tơno ‘na luât.

Kăn ki mơ’no liăn cheăng hiăng mơhnhôk, tối pơtâng hên hdroh, la hiăng vâ chê 1 hơnăm kố, khu mơdró kâ kố ôh tá pêi pro tro tiô dêi tơdroăng ki hiăng kĭ tơkêa. Kăn mơ’no liăn cheăng athế péa hdroh chêh bro hlá mơ-éa mơdrếo lối 44 rơtal liăn kố ing peăng hngêi rak liăn ki tŏng kum, la xuân tá hâi kâi châ tô tơvêh.

‘’Tung pơla kĭ tơkêa tiô pơkâ mâu troăng hơlâ ki vâ mơdrếo chĕn roh má 1, má 2, má 3, laga tung 3 khế ôh tá hâi châ mơdrếo xo ki klâi ôh, tơkéa vâ tối ôh tá ai liăn vâ mơdrếo chĕn mê tiô tơdroăng pơkâ 99 hơnăm 2021 mê pâ thế athế tơvêh xo. Ki kố ôh tá xê to pơtroh ăm Kŏng ti xua hngêi rak liăn ôh tá châ rak vế tơniăn ăm, ôh tá ‘nâi tiah lâi mê hngêi rak tŏng kum tiô kơ tơdroăng ki tiah mê, mê nôkố athế vêh tô mơdrếo. Nôkố, châ mơdrếo xo lơ ôh athế êng hngêi rak liăn’’.

Tơdroăng mơjiâng pro troăng kân Hồ Chí Minh tơkâ luâ peăng Mâ hâi lo pơlê kong kơdrâm Ƀuôn Ma Thuột pêi lối hrá, tơdroăng pêi mơjiâng bu châ dâng 80 rơtal liăn, tung pơla mê, kơxô̆ liăn ki ăm mung pơtân dêi khu ki tơdah xo pêi rak lối 220 rơtal liăn

Kơxô̆ liăn ki mung la hiăng luâ hâi khế ki mơdrếo chiâng ‘’chĕn ki pá vâ tô tơvêh’’ xuân cho tơdroăng ki hlo tơdjuôm a hên hĕng mâu tơdroăng tơkêa bro a kong pơlê Dak Lak. Tiô tối tơbleăng dêi Hngêi rak liăn tơnêi têa kong pơlê Dak Lak ăm ‘nâi, riân troh nôkố, tung tâi tâng kơxô̆ lối 2 rơpâu 115 rơtal liăn liăn ki mung pơtân mê ai vâ chê troh 1 rơpâu rơtal hiăng luâ khế hơnăm mơdrếo.

Hngêi rak liăn tơnêi têa hiăng pơkâ thế rêm khu râ dêi kong pơlê ai troăng hơlâ ki vâ mơdrếo tơvêh kơxô̆ liăn ki mung kố. Pôa Phạm Ngọc Nghị, Kăn hnê ngăn Vi ƀan kong pơlê Dak Lak tối ăm ‘nâi, kong pơlê xuân hiăng mơ’no hlá mơ-éa vâ mơdrếo kơxô̆ liăn ki ối chĕn laga, bu xiâm pơkâ thế mâu kơ koan dêi kong pơlê ‘nâi vâ kơchăng, ôh tá ăm ai tơdroăng klêi mơdrếo liăn ah tro hngêi rak liăn tô dêi chĕn.

“Hngêi ‘măn liăn tối tơbleăng ƀă pơkâ thế mơdrếo tâi kơxô̆ liăn, laga, mơdrếo tâi kơxô̆ liăn drêng ôh tá ai liăn vâ mơdrếo ăm kuăn pơlê, môi tiah tơdroăng ki chêl thiăn. Pơtih tơdroăng tơkêa bro dêi Krông Pač thượng, nôkố ối dâng 400 rơtal liăn vâ mơdrếo ăm kuăn pơlê la tơvêh ki kố, tơnêi têa hiăng mơdrếo xo tâi 400 rơtal liăn, mê kong pơlê ai liăn ulâi vâ ăm dêi kuăn pơlê. Mê nôkố, mơdrếo ƀă ki klâi, ối a tơdroăng pơkâ ki lâi, pro tiah lâi”.

Tơdroăng pơkâ kơxô̆ 99 hơnăm 2021 dêi Chin phuh pơkâ ‘na pơkuâ ngăn, mơdrếo xo liăn, tơvêh tơdroăng tơkêa bro ing tơdroăng xúa liăn ngân mơ’no mê hiăng mơnhên, pro rơdâ ‘na tơdroăng ki mung pơtân kơxô̆ liăn ƀă mơdrếo liăn ki mung pơtân. Tung mê, ai pơkâ: ’’Kơxô̆ liăn ki mung hiăng luâ hâi khế klêi kơ’nâi 3 khế riân sap ing hâi ki mơdrếo liăn mung tiô tơdroăng pơkâ, ki hngêi tơdah xo mơjiâng pro tơmeăm khoăng tá hâi pêi pro lơ drêng châ hlo khu tơdah mơjiâng pro la xúa kơxô̆ liăn ki mê ôh tá tro tơdroăng, mê khu ki pơkuâ ngăn ‘na mơjiâng pro mê athế tơrŭm ƀă mâu kơ koan séa mơnhên ngăn, vêh mơdrếo liăn ngân ki hiăng ăm mung ăm tơná hngêi rak liăn tơnêi têa”.

Laga, a Dak Lak xuân u ối mâu ngế ki mung la chĕn plâ hơnăm. Tơdroăng kố ăm hlo, tâng lơ ai tơdroăng ki tiah mê, lối chât, lối hĭng rơtal liăn dêi tơnêi têa tro mâu khu ki tơdah xo mơjiâng pro tơmeăm, mâu khu mơdró kâ xúa kơxô̆  liăn ki mê pro mâu tơdroăng ki ê, thâo xuân ai tá tơdroăng ki vâ tâ tung kơtong. Kố cho mâu tơdroăng ki mâu kơ koan ai tơdjâk dêi kong pơlê Dak Lak kal hriăn plĕng vâ mơ’no mâu troăng hơlâ ki pơkuâ rak liăn châ tơ-ƀrê tâ.

VOV Tây Nguyên

Nhat Lisa tơplôu ƀă tơbleăng