VOV4.Xơ Đăng - Lối 10 hơnăm pêi pro troăng on tơhrik hơ’lêh vê riân điê̆n tưh, pro ivá krá rơdêi ăm tơdroăng ki hơ’lêh kơxô̆ teăng ăm công tơ điê̆n tưh. Kố xuân cho tơdroăng ki vâ kơvâ on tơhrik pêi pro mơjiâng troăng on tơhrik rơkê tung la ngiâ.

Sap hơnăm 2011, Kŏng ti on tơhrik Dak Lak pơxiâm pơ’lêh chôu cơ khĭ ƀă chôu điê̆n tưh. Chôu kố kum kơvâ on tơhrik chiâng séa ngăn xêh on tơhrik, ôh tá kal kŏng nhân thế lăm chêh kơxô̆ on tơhrik rêm khế môi tiah hdrối nah xếo. Tơdrêng amê, ing Internet, tơmối xuân chiâng séa ngăn on tơhrik hiăng xúa.

Ngoh Nguyễn Xuân Thành, ối kơxô̆ hngêi 225 troăng Y Moan, pơlê kong kơdrâm Ƀuôn Ma Thuột tối ăm ‘nâi, sap ing xúa chôu on tơhrik điê̆n tưh, ngoh loi tơngah khât a tơdroăng ki tơdrăng riân on tơhrik xuân môi tiah hmiân tuăn ‘na ki tơniăn xúa on tơhrik. Ing phân mêm ‘mot tung phôn râng kŏng, ngoh kô chiâng séa ngăn on tơhrik xúa rêm hâi dêi rơpŏng hngêi.

‘’Á hlo tơ’lêi hlâu ‘nâng: má môi cho ki tro păng ‘nâng; má péa, cho tơ’lêi séa ngăn on tơhrik xúa rêm hâi, kum á hbrâ rak tơniăn mâu tơmeăm xúa on tơhrik tung rơpŏng. Pơtih rơnó kố mê mâu tơmeăm xúa on tơhrik á kô tơpâ môi iâ, lơ kơdroh chô xúa, kô kum ăm tơdroăng xúa on tơhrik tơniăn ƀă kơdĭng tâ’’.

Kuăn pơlê kô chiâng tơ’lêi hlâu ti tăng tơdroăng xúa on tơhrik ing phôn râng kŏng chiâng po hyôh măng

Ƀă kŏng ti pêi cheăng tiô rơnó Dawa, pro a kơpong hngêi kơmăi kơmok Tân An, rêm khế thế chêl liăn on tơhrik lối 80 rơtuh liăn on tơhrik, jâ Hồ Thị Lộc – Kăn phŏ pơkuâ Kŏng ti, tối ăm ‘nâi:

‘’Sap ing hâi xúa phân mê ing phôn râng kŏng dêi peăng on tơhrik mê á hlo hên ki tro ‘nâng, môi tiah cho séa ngăn hâi khế xúa on tơhrik rêm khế, rêm hâi; má péa, cho trâm tơdroăng ki tơpâ on tơhrik mê tơbleăng tơdrêng ing mê teăng tơdroăng thế krếo phôn ăm tổng đài on tơhrik. Phân mêm mê xuân tơ’lêi ăm tơdroăng séa ngăn ƀă mơ-éa đơn, mê cho pơxúa ăm khu tê mơdró. Ing phân mêm mê, tâng hlo on tơhrik xúa tung hâi tâk hên mê á kô ăm khu kih thuât vêh séa ngăn mâu troăng on tơhrik ƀă mâu kơmăi kơmok, kum kŏng ti pơkuâ ƀă kơdĭng on tơhrik’’.

Troh nôkố, tơdroăng xúa mâu phân mêm chêh tơdroăng on tơhrik vâ kum tơdroăng pơkuâ mơjiâng tơmeăm khoăng, tơdroăng rêh ối hiăng chiâng hmâ dêi hên ngế ƀă khu tê mơdró a Dak Lak. Mâu tơdroăng chêh kố châ Kŏng ti on tơhrik Dak Lak tơbleăng tung trang Web https://cskh.cpc.vn ƀă ing phân mêm ‘mot tung phôn râng kŏng, cho môi tơdroăng mơhno tơdroăng ki tơdrăng tung tơdroăng rôe tê on tơhrik ƀă kuăn pơlê.

Pôa Nguyễn Văn Chương, Kăn phŏ pơkuâ on tơhrik Dak Lak, tối ăm ‘nâi, hluâ lối 10 hơnăm xúa chôu on tơhrik điê̆n tưh ƀă pêi pro kơmăi chêh tơdroăng chôu on tơhrik ing hơngế hiăng kum mơdêk tơdroăng pơkuâ tê mơdró ƀă mơdêk ki dâi lĕm kum kuăn pơlê xúa on tơhrik a Dak Lak. Kố xuân cho tơdroăng pêi vâ kơvâ on tơhrik pêi pro tơdroăng mơjiâng on tơhrik rơkê tung la ngiâ.

‘’Ƀă pơkâ cho pêi kêi đeăng troăng kơxái on tơhrik rơkê tung mâu hơnăm la ngiâ tung lâp kong pơlê Dak Lak mê kŏng ti xuân dế chôa ‘lâng pêi pro mâu pơkâ mê. Sap hơnăm 2016 kŏng ti hiăng mơ’no liăn rôe kơmăi tơpâ mơ’no ing hơhngế (SCADA) tơniăn ki tro păng ‘nâng, tơniăn, chôu ki tot mơ’no on tơhrik xuân iâ ƀă tơdroăng ki loi tơngah hên ‘nâng. Hơnăm 2014 mê kŏng ti mơ’no liăn rôe mâu rơxế rơnêu on tơhrik, tâi tâng mâu tơdroăng ki tơ’nhê  lơ rơnêu troăng kơxái on tơhrik mê ôh tá kal tơpâ on tơhrik.

Hbrâ pơkuâ xúa on tơhrik kum khu tê mơdró tơniăn, mơdêk châ tơƀrê mơjiâng tơmeăm khoăng

Kŏng ti xuân pêi pro mơ-éa đơn điê̆n tưh sap ing lơ 1/7/2022 vâ kum tung tơdroăng pơkuâ mơ-éa đơn ƀă hnoăng liăn mơhá pêi pro trâu hơngế, tơxâng tiô pơkâ pơ’lêh xúa kơmăi kơmok dêi Chin phuh’’.

Troh tơdế hơnăm kố, Dak Lak hiăng krâ chôu on tơhrik ăm lối 580 rơpâu kuăn pơlê (châ 96,5%). PC Dak Lak khŏm kêi đeăng pơ’lêh 100% chôu on tơhrik ƀă chêh tơdroăng on tơhrik cho xúa kơmăi tâi tâng tung hơnăm 2022 kố. Ƀă mâu troăng pêi kŏng ngê̆ nếo, Kŏng ti mơ-eăm djâ mâu phân mêm kơmăi kơmok riân on tơhrik troh ƀă rêm ngế kuăn pơlê, a tâi tâng rêm tíu ƀă tung rêm kơmăi kơmok điê̆n tưh. On tơhrik Dak Lak xuân dế pơtối mơjiâng mâu phân mêm vâ kum tơtro tâ, môi tiah kô chiâng tối hdrối tơ’nôm on tơhrik, chiâng tối tơbleăng xêh ăm kuăn pơlê xúa on tơhrik mâu tơdroăng ki ai ti tit, tơ’nhê tung tơdroăng xúa on tơhrik ƀă hía hé.

A Sa Ly tơplôu ƀă tơbleăng