VOV4.Xơ Đăng - Mâu hâi hdrối kố nah, maluâ yă têa châu têa kơxăng hiăng chu kơdroh hên la yă cước pơto chơ kế tơmeăm, kuăn mơngế a Dak Lak xuân ôh tá hlo pơhlêh.Hên khu ki pơkuâ mơdró kâ tối tiah kố, vâi kal ai hâi khế vâ tơkôm hneăng ki pơhlêh yă têa châu têa kơxăng tơniăn tâ nếo pêi pro tơdroăng ki ‘mâi rơnêu yă cước.

Khu pêi cheăng tơrŭm pơto chơ tơmeăm dêi kong pơlê Dak Lak  ai dâng 100 toăng rơxế va achơ tŭm túa, kơtâu troh mâu kong pơlê tung lâp tơnêi têa. Pôa Đặng Quang Điện- Ngế pơkuâ khu pêi cheăng tơrŭm tối, drêng yă têa châu têa kơxăng to kơnâ troh a 31.000 - 32.000 liăn/lit têa kơxăng, têa châu a mâu rôh khế 5, 6 ƀă 7/2022, Khu mơdró hiăng hbrâ pro to kơlo liăn chơ dâng 15% tâng vâ pơchông ƀă poăng hơnăm. Mơhé pro to yă la khu mơdró xuân ối lup drêng pêi cheăng tê mơdró tung pơla mâu khế ki mê. Tơdroăng pơtối rak ăm mâu rơxế kơtâu ki khât cho vâ râng chêng tơmối. Ing mơ’nui khế 7/2022 troh nôkố, yă tê châu têa kơxăng pơtối chu ƀă dế a kơlo 26.100liăn /lit têa kơxăng ƀă 24.300 liăn/lit têa châu, mê khu mơdró xuân ối kơdroh yă ki chơ. Xua kơlo yă têa châu môi tiah nôkô, khu mơdró nếo pơtân tŭm vâ boăng, vâ tối hâi teăm ai rơkâ.  Pôa Đặng Quang Điện tối nhên:

“Ƀă kơlo yă têa kơxă, têa châu môi tiah nôkố dâng 25 rơpâu - 26 rơpâu liăn môi lit  mê ƀă khu mơdró nếo pơtân tơniăn, kơtâo rơxế thế ai tŭm  kơxô̆ liăn rôe têa châu ƀă mơhá hnoăng mơngế vê, mơngế pin pơto chu kế tơmeăm. Kố cho kơlo ki tơdế tê, hâi teăm xê kơlo ki iâ. Tâng têa châu têa kơxă vêh a kơlo 22 rơpâu - 23 rơpâu liăn môi lit ƀă tơniăn ton ta ah ing 2-3 khế klêi kơ’nâi ngin kô riên kơdroh liăn chơ pơto vâ tơniăn hnoăng ki pơxuá ăm tơmối’’.

Mâu khu mơdró chơ tơmối a Dak Lak hâi pêi pro kơdroh yă chơ mơhé têa kơxăng têa châu chu rơpâ ó tung mâu hâi a chê kố.

‘Na khu mơdró chơ tơmối, tơmeăm dêi Trần Toàn a pơlê kongkơdrâm Buôn Ma Thuột ai 6 toăng rơxế kơtâu chơ tơmối , kơtâu ing Dak Lak troh Hà Nội. Pôa Trần Trung, Ngế pơkuâ khu mơdró ăm ‘nâi,drêng liăn têa kơxă, têa châu a kơlo kơpêng páxôp 20 rơpâu liăn môi lit, kơxô̆ liăn ‘no rôe têa châu ăm môi hdrôh rơxế kơtâu prôk vêh pơla ing Dak Lak troh Hà Nội tâi 22 rơpâu troh 23 rơpâu liăn. Yă vé pơla ki mê ai 650 rơpâu liăn/ngế, kế tơmeăm ai 3 rơtuh tấn. La ga, drêng yă têa châu to kơnâ 32 rơpâu liăn môi lit  kơxô̆ liăn ‘no rêm rôh rơxế kơtâu  thế tâi 35-36 rơtuh liăn, kơlo ki tâk 1,5 hdrôh mê khu mơdró khŏm thế pro to yă kơtâu a kơlo 600 rơpâu liăn/vé. Kơlo tâk mê tơdâng ƀă 15% tâng vâ pơchông ƀă hơnăm 2022. Nôkố yă têa châu , têa kơxă hiăng chu ƀă dế a kơlo 25 rơpâu - 26 rơpâu liăn/lit, rêm hdrôh rơxế kơtâu xuân ối tâi 30-32 rơtuh liăn, ƀă kơlo ki mê nếo bú pơtân  châ tơvêh dêi liăn ‘no apoăng tê, hâi teăm ai rơkâ vâ pro kơdroh yă vé lơ yă rơxế kơtâu rêm hdroh chơ tơmeăm. Pôa Trần Trung tối:

“ kơxô̆ liăn prôk hdrối mê ngoh ăm ‘nâi ti mê, rêm hdrôh prôk vêh thế tâi 35 rơtuh liăn têa châu, nôkố kơdroh bú dâng 203 rơtuh tê, la xuân ối tâi xap 32 - 33 rơtuh liăn. Tối tơchoâm yă têa châu môi tiah nôkố  xuân ối to kơnâ , ngin xuân púi vâ pơtôí kơdroh nếo. Tâng kơlo 22 rơpâu liăn môi lit khu mơdró kô kơdroh yă vé hlối  kô chu a kơlo 650 rơpâu liăn/vé ƀă 3rơtuh liăn/tâ̆n tơmeăm ki chơ’’.

Yă chơ xuân hâi châ khu mơdró a Dak Lak pro kơdroh mơhé yă têa  vâ chu  kơdroh ó.

Tiô riên ngăn dêi Khu xiâm ngăn troăng prôk rơxế kơtâu Dak Lak ăm hlo, lâp tung kong pơlê nôkố ai lối 17 rơpâu toăng rơxế chơ mâu tơmeăm tŭm túa. Tung mê ai 14 rơpâu toăng rơxế kân, 500 toăng rơxế  chơ tơmối ki hmâ kơtâu , 250 toăng rơxế hợp đŏng , 350 toăng rơxế buýt ƀă dâng lối 2 rơpâu 500 troăng rơxế taxi. Tiô pôa Lê Đình Minh, Kăn phŏ pơkuâ ngăn troăng prôk rơxế kơtâu  Dak Lak , xua ôh tá ai pơkâ luât ki pơkhât thế mâukhu mơdró thế ‘mâi hơ’lêh yă kơtâu drêng yă têa châu to kơnâ lơ chu rơpâ, mê drêng ai tơdroăng pơ’lêh ‘na yă tâi tâng mâu khu mơdró xuana thế ‘nâi hbrâ pêi pro xêh vâ mơdêk lơ pro chu yă rơxế kơtâu, khu xiâm ngăn lơ khu râ kơvâ cheăng ‘na  rơxé pá vâ veăng tơmân. Laga,  drêng yă têa kơxă têa châu chu kơdroh môi tiah nôkố, khu xiâm kô pro hlá mơ-éa hne etối mơhnhôk mâu khu mơdró ‘mâi hơ’lêh kơdroh yă rơxế kơtâu, vâ pro tơniăn ƀă pơxúa tơ’mô pơla péa pâ.

“’Na rak ngăn Tơnêi têa, Khu xiâm ngăn troăng prôk rơxế kơtâu hiăng chêh pro hlá mơ-éa  hnê tối ƀă mơhnhôk troh mâu tíu pêi heăng tê mơdró rơxế kơtâu chơ tơmối, ngế pơkuâ rơxế kơdroh yă chơ vâ tơniăn ‘na yăn, tơniăn kế tơmeăm ki ăm chơ, xuân môi tiah tơmối ki pin chơ lơ tơmeăm pro tơtro yă chơ. Tơdroăng mê xuân thế ing Khu mơdró vâi pêi pro dêi, vâi kơdroh vâ tơbriêt ƀă rak tơmối, ƀă drêng têa kơxăng chu nếo mê yă chơ kô rơtế chu kơdroh tơmối ki to ôh tá vêh rŏng ƀă khu mơdró dêi tơná.

          Tuấn Long chêh

Gương tơplôu ƀă tơbleăng