Pôa Phạm Tuấn Anh, Kăn pơkuâ Khu ngăn chiâk deăng ƀă Mơnhông thôn pơlê kong pơlê Dak Nông ăm ‘nâi, sap ing khế 9/2019 troh apoăng khế 10.2022, lâp kong pơlê ai 113 ngế kăn ƀô̆ rak ngăn loăng pơlái kuăn kiâ kong, mâu ngế cheăng ‘na rak ngăn kong pâ pơtê cheăng, 35 ngế hơ’lêh tíu pêi cheăng chiâng pêi mâu kơvâ cheăng ki ê.

Kơxô̆ ngế pơtê cheăng ƀă hơ’lêh tơdroăng cheăng châ troh 20% tung tâi tâng kơxô̆ ngế kăn ƀô̆, mâu ngế pêi cheăng a mâu tíu pêi cheăng rak ngăn loăng pơlái, khu rak ngăn kong ƀă mâu kŏng ti pêt kong ối tung tơdroăng pơkuâ ngăn dêi tơnêi têa. Tơdroăng ki hên hĭn kăn ƀô̆ rak ngăn kong pâ pơtê cheăng rế pro pá kân ăm tơdroăng cheăng rak ngăn kong a Dak Nông, drêng khu cheăng bu iâ ƀă athế séa ngăn hên tơdroăng cheăng, rak ngăn kân mâu tơnêi tơníu. Tơdroăng kố xuân tơdjâk troh hiâm mơno dêi mâu ngế ki dế pêi cheăng, rế hía rế hên pâ pơtê lơ hơ’lêh pêi cheăng a tíu ki ê.

Mâu ngế pêi cheăng rak ngăn kong pei cheăng tung tơdroăng ki xơpá, rơ-iô, tung pơla kơxô̆ liăn châ kâ iâ, ôh tá pêi pro châ mâu tơdroăng ki rơhêng va dêi tơdroăng rêh ối

Vâ hbrâ mơdât tơdroăng kố, pôa Phạm Tuấn Anh ăm ‘nâi, Khu ngăn chiâk deăng ƀă Mơnhông thôn pơlê kô tí tăng ‘nâi plĕng ăm kong pơlê mâu troăng hơlâ tŏng kum, mơhnhôk khu ki rak ngăn kong; la ‘na ki ton xŏn, tơnêi têa kal ai mâu troăng hơlâ tŏng kum vâ hơ’lêh kơxô̆ liăn pêi lo, tơdroăng ki tŏng kum kơjo vâ mâu ngế pêi cheăng hmiân tuăn rak ngăn kong.