Kơxê lơ 28/12, Khu kăn pơkuâ hnê ngăn kong pơlê Dak Nông tơkŭm po Leh diâp Pri hlá tơbeăng ‘na mơjiâng Đảng (Pri Búa liềm vàng) roh má VII hơnăm 2022. Hluâ 1 hơnăm mơhnhôk pêi pro, Khu tơkŭm po hiăng tơdah châ 64 ƀai chêh veăng Tơ’noăng. Tiô mơnhên, mâu ƀai veăng tơ’noăng hiăng chêh tro tiô tơdroăng, chêh teăm tơdrêng mâu tơdroăng nếo ai dêi kong pơlê, ki má môi cho ƀai chêh tối tơdroăng môi hiâm mơno dêi tâi tâng khu cheăng kal kí tung pêi pro pơkâ hneăng hôp Đảng ƀô̆ mâu râ ƀă Pơkâ Đảng ƀô̆ kong pơlê roh má XII, hneăng hơnăm 2020 – 2025; mơjiâng, rak  tơniăn Đảng; hriâm tâp ƀă pêi tiô tơdjâ, hiâm mơno Hồ Chí Minh... chêh xo tâi tâng mâu tơdroăng rêh ối pơlê pơla.

A roh leh, Khu tơkŭm po Hneăng tơ’noăng hiăng diâp 36 ƀai chêh ki má môi, tung mê ai 3 pri A, 9 pri B, 15 pri C, 9 pri mơhnhôk; tơdrêng amê, kheăn kơdeăn ăm 2 khu pú hên ki rơkê má môi tung tơdroăng po rơdâ pêi pro.