Tâng ối a dế pơla kơdrum krui ngeăm, krui kuit ki dế drêh lĕm a chêng ngo on Nâm Kar, nâ Nguyễn Thị Mai, kăn pơkuâ Khu pêi chiâk deăng tơrŭm pêi chiâk deăng – Pêt kong hưh cơ Quảng Phú, cheăm Quảng Phú, tơring Krông Nô ôh tá kâi piu mâu hâi pin, ting tông tơrêm to hmốu vâ tăng tơnêi pêt loăng. Nâ ăm ‘nâi, vâ pêt krui drêh, krui ngeăm hưh cơ a kơpong tơnêi hmốu kơtâk, ngôi on, troăng hơlâ cho mơ-eăm kơhnâ bro chiâng a tíu ki lêk a ‘nâi, ‘mot tơ’nôm tơnêi lĕm rêm hơnăm.

Kơnôm ing tơdroăng ki khên tơnôu tung túa ki pêi ƀă troăng prôk, klêi kơ’nâi 5 hơnăm nâ hiăng châ krí plâi ngeăm a kơpong tơnêi lĭng kố. Lối 4 ha krui drêh, krui ngeăm châ xo vâ chê 100 tâ̆n rêm hơnăm, châ mâu khu ki tơrŭm kĭ tơkêa roê a kơdrum ƀă kơlo yă tơniăn 35 rơpâu liăn tung môi kg. Plâi nôkố hiăng châ tê tung siêu thĭ a Pơlê kong kân Hồ Chí Minh, Bình Dương, Hà Nội ƀă mâu kong pơlê ki a chê.

Sap ing ƀlêi chiâng kố, nâ Mai tơrŭm ƀă mâu rơpŏng kuăn pơlê ki pêi chiâk deăng tung kơpong, mơjiâng Khu pêi cheăng tơrŭm pêi chiâk deăng hưh cơ, tăng cheăng pêi ăm lối 50 ngế pêi cheăng ƀă kơlo pêi lo liăn dâng 10 rơtuh liăn tung môi khế.

“Klêi kơ’nâi 20 hơnăm tê mơdró plâi pôm mê á ai tơmối cho mơngế Nhuk mê xuân ai mâu tơdroăng ki hnê tối ‘na ki rơkê plĕng. Mê nếo hriâm ing hlá mơ-éa, ing tơdroăng ki ai khât hriăn ngăn a mê nếo mê drêng pêt á hiăng khên tơnôu. Khu pêi cheăng tơrŭm xuân dế po rơdâ ƀăng tơnêi pêt tŏng kum mơdêk mâu tíu pêi cheăng, mâu ngế krê dế ai troăng tơmiât vâ pêt krúa. Mê nếo xuân dế po rơdâ bro hdrê ƀă kô mơnhông kơpong vâ pro kơpong ki xiâm tung tơnêi tơníu ki tơniăn lĕm ƀă hên ki ê”.

Xuân xông tơtêk sap ing tơdroăng ki ai khât tung tê mơdró kơphế krúa, nâ Đậu Thị Nguyệt, a tôh kơphô̆ 4, pơlê kân Dak Mâm, tơring Krông Nô, hiăng mơjiâng Khu pêi cheăng tơrŭm Tin True Coffee. Nôkố, khu pêi cheăng tơrŭm ai 7 ngế cheăng ƀă tơrŭm ƀă 20 rơpŏng kuăn pơlê pêt kơphế hưh cơ, tê ăm kơchơ mơdró 8 túa hdrê kơphế tơpoăng, ƀă dế hriăn ngăn bro mâu kế tơmeăm sap ing reăng ƀă kơtôu kơphế.

Nâ Đậu Thị Nguyệt ăm ‘nâi:

“Rế hía rế pêi rế hriâm ƀối tơ’nôm mê nếo mơjiâng Khu pêi cheăng tơrŭm djâ troh kế tơmeăm krúa ăm tâi tâng rêm ngế ôu krúa tâ á xuân oh tá roê xo tơmeăm ki vâi tê hên hĭn tung kơchơ mê xuân hmiân tuăn. Á rơhêng vâ vâi krâ nhŏng o tung khu pêi cheăng rơtế môi hiâm mơno, khu pêi cheăng tơrŭm xuân mơ-eăm sap ing tơxĭn mơ-eăm xông mơ-eăm bro tiah lâi ai tơdroăng cheăng pêi ăm rêm ngế ƀă ai liăn pêi lo tơniăn”.

Tiô nâ Nguyễn Thị Mai, Kăn hnê ngăn Khu vâi kơdrâi pơlê kân Dak Mâm, tơring Krông Nô, mâu túa pơkâ vâi kơdrâi tơkâ luâ mơnhông cheăng kâ tơƀrê hiăng bro pơxúa mâu ki tơƀrê kơhnâ, kum mâu nâ o loi tơngah tâ tung tơdroăng ki mơhno tối hnoăng cheăng, tíu pêi cheăng dêi tơná tung rơpŏng hngêi ƀă pơlê pơla:

“Mê hiăng nhên tơdroăng ki hiăng pêi pro ‘na pêi lo liăn ngân ing mâu hnoăng cheăng, ki kơnía dêi vâi kơdrâi châ mơdêk hên khât. Sap ing mâu túa pơkâ ki apoăng kố, mê rêm râ kô hlê plĕng mâu ƀai hriâm ki tơtro vâ tơná ai môi troăng prôk ki tro má môi vâ tơná tơbleăng mâu túa pơkâ a kơ’nâi kố ƀă mâu tơdroăng ki rơhêng vâ tiah kố ƀă mâu vâi nâ o ki ai túa tơmiât, ai tơdroăng ki rơhêng vâ ai tơdroăng ki kơhnâ mê á kô kum vâi tâi ivá tơná vâ ăm mâu nâ o mê ƀlêi chiâng tung pơkâ ki mâu nâ o mê hiăng rah xo”.

Nâ Đậu Thị Nguyệt dế tơbleăng mâu kế tơmeăm bro ing kơphế dêi Khu pêi cheăng tơrŭm

Jâ H’Vi Êban, Kăn hnê ngăn vâi kơdrâi kong pơlê Dak Nông ăm ‘nâi, vâ mơdêk tơdroăng ki loi tơngah, pêi pro krê xêh dêi vâi kơdrâi, tung pơla hdrối nah, rêm râ tung kong pơlê tơkŭm po hên tơdroăng cheăng ki ai pơxúa, rơkê, tơtro ƀă tơdroăng ki ai khât. Hên túa pơkâ pơxiâm vâ pêi cheăng, rak ngăn, rơtế prôk ƀă vâi kơdrâi dế mơ’dêk hlo tơƀrê. Kum vâi nâ o ai tơdroăng mơ-eăm, ing tơdroăng ki tŏng kum dêi Hngêi rak liăn tŏng kum rêh ối pơlê pơla ƀă kơxô̆ liăn ai tơdroăng cheăng, khu vâi kơdrâi rêm râ hiăng ‘no lối 1 rơpâu rơtal liăn, ăm lối 23 rơpâu ngế mung mơnhông cheăng kâ.

“Tung la ngiâ ah, Khu ngăn vâi kơdrâi kong pơlê kô pơtối tơbleăng tơdroăng vâi kơdrâi mơ-eăm hluăn kơtiê, pơkuâ tơdroăng rêh ối. Ki nhên ngin kô pêi pro tro tơdroăng tơkêa tŏng kum vâi kơdrâi pơxiâm vâ pêi cheăng hơnăm 2021 – 2025. Pakĭng mê, ngin kô tơrŭm ƀă mâu kơvâ cheăng ki ai tơdjâk troh vâ hnê cheăng ƀă tiâ mơnhên tơbleăng tơdroăng cheăng pêi tiô tơdroăng rơhêng vâ dêi mâu tíu pêi cheăng ƀă ngin kô tŏng kum vâi kơdrâi châ mung ƀă xúa mâu tơdroăng ăm mung vâ kơdroh kơtiê ƀă mơnhông cheăng kâ”.

Ƀă tơdroăng ki kơhnâ, rơkê, loi tơngah dêi tơná, vâi kơdrâi Dak Nông dế rế hía rế pơkâ hnoăng cheăng dêi tơná drêng pơkuâ mâu túa pơkâ mơnhông mơdêk cheăng kâ, mơdêk pêi lo liăn ƀă bro chiâng ivá tơdjâk tung pơlê pơla.